६७ हजार ८९० जनाले पाए सामलिङ्गको १० कित्ता सेयर, २१ लाख बढीको हात खाली

काठमाडौं । ऊर्जा डेभलपर्सको सहायक कम्पनी सामलिङ्ग पावर कम्पनीको सेयर बाँडफाँड भएको छ । कम्पनीले इलाममा सञ्चालित ९.५२ मेगावाटको माईबेनी जलविद्युत आयोजनाको सर्वसाधारणका लागि निष्कासन गरेको सेयर बाँडफाँड भएको हो ।

कम्पनीको सेयरका लागि दिएका मध्ये ६७ हजार ८ सय ९० जनाले मात्र गोलाप्रथाबाट १० कित्ता सेयर पाएको बिक्री प्रबन्धक नेपाल एसबिआई मर्चेण्ट बैंकिङ्ग लिमिटेडले जनाएको छ । कम्पनीका अनुसार करिब २१ लाख २० हजार जनाको हात खाली भएको छ । कम्पनीको सेयर किन्न कुल २१ लाख ९८ हजार ७६४ जनाले आवेदन दिएका थिए ।

कम्पनीले सय रुपैयाँमा अंकित ७ करोड ३० लाख रुपैयाँ बराबरको ७ लाख ३० हजार कित्ता सेयर निष्कासन गरेको थियो । जसमा प्रतिशत अर्थात १४ लाख ६० हजार रुपैयाँ बराबरको १४ हजार ६ सय कित्ता कर्मचारीका लागि सुरक्षित गरिएको थियो ।

यस्तै, ५ प्रतिशत अर्थात ३६ लाख ५० हजार रुपैयाँ बराबरको ३६ हजार ५ सय कित्ता सामुहिक लगानी कोषका लागि छुट्याइएको थियो । र, बाँकी ७  लाख ७८ हजार ९  सय कित्ताका लागि सर्वसाधारणका लागि निष्कासन गरिएको थियो ।

कम्पनीले यसअघि पनि पहिलो चरणमा आयोजना प्रभावित स्थानीयका लागि छुट्याएको ५ करोड रुपैयाँ बराबरको ५ लाख कित्ता सेयर निष्कासन गरी बाँडफाँड गरिसकेको छ ।

कम्पनीले निर्माण सम्पन्न गरेको माइबेनीले विद्युत उत्पादन गरिरहेको छ । आयोजनाको विद्युत गत भदौ २२ गते प्रणालीमा जोडिएको थियो ।