ऊर्जा खबर
काठमाडौं । बागमती प्रदेशमा निर्माण गर्न लागिएको ६८३ मेगावाटको सुनकोसी–३ जलाशय जलविद्युत आयोजनाको वातावरणीय प्रभाव मुल्याङ्कन क्षेत्र निर्धारण गर्न राय/सुझाव माग गरिएको छ । विद्युत विकास विभागले आयोजनाको क्षेत्रधिकार निर्धारण गर्न सराेकारवालासँग राय/सुझाव मागेको हो ।
स्थानीय सरोकारवालासँग आयोजना निर्माण गर्दा पर्न सक्ने भौतिक, जैविक, सामाजिक, आर्थिक तथा सांस्कृतिक वातावरणीय प्रभावका सम्बन्धमा रायसुझाव मागिएको छ । प्रस्तावित आयोजनाबाट प्रभावित हुने गाउँपालिका, नगरपालिका, तथा त्यहाँका विद्यालय, अस्पताल, स्वास्थ्य चौकी एवं सरोकारवाला व्यक्तिसँग एक साताभित्र प्राप्त हुने गरी रायसुझाव पढाउन भनिएको छ ।
आयोजनाबाट सिन्धुपाल्चोक, काभ्रेपलाञ्चोक, रामेछाप र सिन्धुली प्रभावित हुनेछन् । सिन्धुपाल्चोकको सुनकोसी गाउँपालिका, बलेफी गाउँपालिका, चौतारा साागाचोकगढी नगरपालिका, इन्द्रावती गाउँपालिका र मेलम्ची नगरपालिकाका स्थानीयसँग राय/सुझाव माग गरिएको छ ।
यस्तै, काभ्रेपलाञ्चोकको मन्डनदेउपुर नगरपालिका, पाँचखाल नगरपालिका, भुम्लस गाउँपालिका, चौरीदेउराली गाउँपालिका, तेमाल गाउँपालिकाका विभिन्न वडा प्रभावित हुने देखिएको छ । रोमछापको खाडाँदेवी गाउँपालिका र सुनापाती गाउँपालिका तथा सिन्धुलीको सुनकोसी गाउँपालिकाको विभिन्न वडा प्रभावित हुन सक्ने देखिएको विभागले जनाएको छ । पालिका अन्तर्गतका विद्यालय, अस्पताल, स्वास्थ्य चौकी एवं सरोकारवाला व्यक्तिसँग रायसुझाव पढाउन भनिएको छ ।
आयोजना सिन्धुपाल्चोक, सिन्धुली, काभ्रेपलाञ्चोक र रामेछाप जिल्लाको सिमाना भएर बग्ने सुनकोसी नदीमा प्रस्ताव गरिएको छ । आयोजनाको बाँध काभ्रेपलाञ्चोक र रामेछापकाे सिमानामा प्रस्ताव गरिएको छ ।
विद्युत गृह काभ्रेपलाञ्चोकमा रहनेछ । आयोजनामा नेपाल विद्युत प्राधिकरण र बंगलादेशको पावर डेभलपमेन्ट बोर्डले सयुक्त रुपमा लगानी गर्नेछन् ।
