१४ किलोमिटर लामो प्रसारण लाइन निर्माण गर्दै माबिलुङ्ग इनर्जी

काठमाडौं । माबिलुङ्ग इनर्जी लिमिटेडले १४ किलोमिटर लामो प्रसारण लाइन निर्माण गर्ने भएको छ । कम्पनीले ४.९५ मेगावाको माथिल्लो पिलुवा खोला–३ जलविद्युत् आयोजनाकोे विद्युत् प्रवाह हुने ३३ केभी प्रसारण लाइन निर्माण गर्न लागेको हो । 

कोशी प्रदेश अन्तर्गत संखुवासभा जिल्लाको मादी नगरपालिका वडा नम्बर ७ मा अवस्थित माथिल्लो पिलुवा खोला–३ को स्वीच्यार्डदेखि सोही जिल्लाको चैनपुर नगरपालिका वडा नम्बर ८ मा रहेको नेपाल विद्युत् प्राधिकरणको बानेश्वर सबस्टेसनसम्म ३३ केभीको १४ किलोमिटर लामो सिंगल सर्किट प्रसारण लाइन निर्माण गर्न लागेको कम्पनीले जनाएको छ । कम्पनीले आयोजना निर्माण तथा सञ्चालन गर्दा पर्न सक्ने प्रतिकुल असरबारे सूचना प्रकाशित भएको ३५ दिनभित्रमा लिखित राय÷सुझाव पेश गर्न आग्रह गरेको छ ।  

१४ किलोमिटर लामो प्रसराण लाइनमा जम्मा २५५ वटा पोलहरु खडा गरिनेछ । पोलको उचाई १३ मिटर तथा पोलाहरू बीचको औसत दुरी ७० मिटर हुनेछ । यस प्रसारण लाइन आयोजना निर्माण गर्न ९.३६५७ हेक्टर जग्गा आवश्यक पर्ने अध्ययनले देखाएको छ । प्रसारण लाइन निर्माणको काम ६ महिनाभित्र सम्पन्न गर्ने कम्पनीलको लक्ष्य रहेको छ ।