ऊर्जा खबर
काठमाडौँ । नेपाल विद्युत प्राधिकरणले पहिलो पटक सञ्चालन गरेको ३० दिने सेवाकालीन तालिम सम्पन्न गरेको छ । प्राधिकरण तालिम व्यवस्थापन विभागले असार १८ गतेदेखि २० गतेसम्म सञ्चालन गरेको तालिम सम्पन्न भएको हो ।
तालिम समापन समारोहमा कार्यकारी निर्देशक हितेन्द्रदेव शाक्यले प्राधिकरणले तालिमलाई उच्च महत्त्व दिएको र आगामी दिनमा सेवाकालीन तालिमलाई अभियानकै रूपमा सञ्चालन गर्ने बताए । आगामी ५ वर्षभित्र सम्पूर्ण कर्मचारीलाई यस्तो तालिम दिने गरी व्यवस्था गर्न विभागलाई निर्देशन दिए ।
यसैगरी, इन्जिनियरिङ सेवा निर्देशनालयका उपकार्यकारी निर्देशक फणीन्द्रराज जोशीले तालिममा सिकेको ज्ञान तथा सीपले प्रशिक्षार्थीको कार्यसम्पादन थप प्रभावकारी हुने विश्वास व्यक्त गरे । साथै, विभागका निर्देशक मोतिलाल महताराले तालिममा उत्तीर्ण सम्पूर्ण प्रशिक्षार्थीलाई वधाई ज्ञापन गरेका थिए ।
सहभागीको तर्फबाट समेत तालिम अत्यन्त प्रभावकारी रहेको र आगामी दिनमा यसलाई निरन्तरता दिन आग्रह गरिएको थियो । कार्यकारी निर्देशकको निर्देशनअनुसार तालिमलाई थप प्रभावकारी बनाउने कार्य गर्ने विभागका प्रशासन प्रमुख भरत केसीले प्रतिबद्धता जनाए ।
विभागका अनुसार उक्त तालिममा तह ३ का २० जना इलेक्ट्रिसियनको सहभागिता रहेकोमा सबै प्रशिक्षार्थी उत्तीर्ण भएको जानकारी दिइएको छ ।
.jpg){kind=spacer}
