ऊर्जा खबर
काठमाडौं । २८.३०४ मेगावाटको मध्य चमेलिया जलविद्युत आयोजना निर्माण हुने भएको छ । सुदुरपश्चिम प्रदेशको दार्चुला जिल्लामा पहिचान भएको आयोजना दार्चुला पावर प्रालिले अघि बढाउन लागेको हो ।
आयोजनाको प्रारम्भिक वातावरणीय परीक्षण अध्ययनको काम सुरु भएको कम्पनीले जनाएको छ । अध्ययनका क्रममा कम्पनीले आयोजना निर्माण गर्दा स्थानीय क्षेत्रको भौतिक, जैविक, प्राकृतिक, सांस्कृतिक, आर्थिक तथा सामाजिक क्षेत्रमा पर्नसक्ने असरबारे सरोकारवालासँग राय÷ सुझाव मागेको छ । असरबारे सम्बन्धित सरोकारवालालाई अबको एक साताभित्र आइपुग्ने गरी राय सुझाव पठाउन भनिएको हो ।
जिल्लाको मार्मा गाउँपालिकाको वडा नम्बर २, ३, ४, ५ र ६ भएर बग्ने चमेलिया नदीको पानी प्रयोग गरी लामबगरमा बाँध निर्माण गरिने कम्पनीले जनाएको छ । बाँधमा जम्मा भएको पानी करिब ७ हजार ८० मिटर लामो हेडरेस पाइप मार्फत सतही विद्युतगृहमा खसाली विद्युत उत्पादन हुने गरी डिजाइन तयार गरिएको छ ।
आयोजना सम्पन्न गर्न ६ अर्ब १८ करोड ९४ लाख ४४ हजार रुपैयाँ लागत अनुमान गरिएको छ । आयोजना सम्पन्न भएपछि वार्षिक सरदर ११८.५२ गिगावाट घण्टा विद्युत उत्पादन हुन्छ ।
यही खोलामा ४० मेगावाटको चमेलिया जलविद्युत आयोजना निर्माणाधीन छ । आयोजनाको ४० प्रतिशत बढी काम पूरा भएको छ ।
