एनएमबी बैंकले साढे ५ हजार भन्दा बढी सुधारिएको चुलो बाड्यो

काठमाडौं । व्यावसायिक बैंकिङको प्रवर्द्धन, ऊर्जा क्षेत्रमा लगानी विस्तार र हरित अर्थतन्त्रलाई बढावा दिँदै आएको एनएमबी बैंक लिमिटेडले सुदूरपश्चिम तथा कर्णाली प्रदेशका विभिन्न ठाउँमा सुधारिएको चुलो वितरण गरेको छ ।

बैंकले नेदरल्याण्ड डेभलपमेन्ट अर्गनाइजेशन (एसएनभी) को ‘नतिजामा आधारित लगानी’ परियोजना अन्तर्गत ५,७२८ सुधारिएको चुलो वितरण गरेको हो । बैंकले परियोजनासँग मिलेर त्यसका लागि कोष व्यवस्थापकको भूमिकामा काम गरेको थियो ।

बैंकको लघुबित्त विभागले एसएनभीसँग सहकार्य गरेर उक्त परियोजनामा कार्य गरिरहेको छ भने अन्य परियोजनाहरूसँग सहकार्य गरेर सेवा प्रदान गर्दै आइरहेको छ । यस परियोजनाले दाउराको खपत घटाएर वन संरक्षणमा मद्दत पुग्ने, महिलाहरूले भान्छाको लागि गर्नुपर्ने कठिनाईमा कमी ल्याउने उद्देश्यसहित काम गरिरहेको छ ।

यसैगरी, वायु प्रदूषणमा समेत नियन्त्रण भई समग्र आगलागीको खतरा तथा भान्छाको प्रदूषणका कारण स्वास्थ्यमा आउने रोग तथा विकारहरूमा समेत कमी हुने विश्वास लिइएको छ ।

एनएमबी दि फिनान्सियल टाईम्स, लण्डनको ‘द ब्यान्कर’ पत्रिकाद्वारा एसियाकै सर्वोत्कृष्ट बैंकको उपाधि ‘बैंक अफ दिइयर एसिया २०२१’ बाट सम्मानित भएको बैंक हो । बैंकले सन् २०१७, २०१८, २०२० र २०२१ लागि उक्त पत्रिकाद्वारा नेपालकै उत्कृष्ट बैंकको उपाधिी प्राप्त गरिसकेकको छ । बैंकले हाल देशभरि २०१ शाखाहरू, १३८ एटिएमहरू र ११ एक्सटेन्सन काउन्टरमार्फत उच्चस्तरीय सेवा प्रदान गर्दै आइरहेको छ ।