ऊर्जा खबर
काठमाडौँ । नेपालको विद्युत् र सिँचाइ सेवा सुधार्ने भन्दै विश्व बैंकले नेपाललाई २५ करोड ७० लाख डलर (आजको दरमा ३५ अर्ब ११ करोड ३९ लाख १० हजार रुपैयाँ) ऋण दिने भएको छ । विश्व बैंकको कार्यकारी निर्देशकहरुको बोर्डले मे २९ मा नेपाललाई दुई परियोजनामार्फत उक्त ऋण प्रस्ताव स्वीकृत गरेको जनाएको छ ।
बैंकका अनुसार विद्युत् आपूर्तिको विश्वसनीयता सुधार (इलेक्ट्रिसिटी सप्लाई रियालबिलिटी इम्प्रुमेन्ट) परियोजना लागि १२ करोड डलर ऋण दिने छ । यो परियोजनाले कोशी, बागमती, कर्णाली र सुदूरपश्चिम प्रदेशमा विद्युत् वितरण सञ्जाल सुदृढ बनाउने र उपभोक्ताहरूलाई गुणस्तरीय विद्युत् सेवा पुर्याउने छ । विद्युत् वितरण सञ्जाल नेपाल विद्युत् प्राधिकरणको नेतृत्वमा सञ्चालित यो परियोजनाले नयाँ वितरण सबस्टेसन निर्माण, पुराना सञ्जालहरूको स्तरोन्नति, र वितरण सञ्जालहरूको वास्तविक समय अनुगमन गर्न स्वचालित प्रणाली कार्यान्वयनमा केन्द्रित रहनेछ जसले सञ्चालन दक्षता वृद्धि गर्ने बताएको छ ।
त्यस्तै, दोस्रोमा रानी जमरा कुलरिया सिँचाइ परियोजनाको विस्तार रहेको छ । तेस्रो चरणमा १३ करोड ७० लाख डलरले सिँचाइ सेवा सुधार गर्ने र कृषि उत्पादकत्व वृद्धि गर्ने उद्देश्य लिएको छ । यो परियोजनाले सुदूरपश्चिम प्रदेशको कैलाली जिल्लामा वर्षैभरि सिँचाइ सेवा विस्तार गरी १७ हजार ५०० हेक्टर जमिनमा सिँचाइ पुर्याउने लक्ष्य छ । जसबाट १ लाख ६० हजार मानिस लाभान्वित हुनेछन् । यो परियोजना नेपाल सरकारको जलस्रोत तथा सिँचाइ विभाग र कृषि विभागको सहकार्यमा कार्यान्वयन हुनेछ ।
विश्व बैंकको माल्दिभ्स, नेपाल र श्रीलंकाका लागि देशीय निर्देशक डेविड सिसलेनले नियमित विद्युत् आपूर्ति र वर्षैभरि पर्याप्त सिँचाइ सुविधा दिगो विकासका आधारभूत पूर्वाधार भएको बताएका छन् ।
