ऊर्जा खबर
काठमाडौं । नेपाल र भारतबीच दीर्घकालीन विद्युत व्यापार गर्ने सम्झौता भएको छ । प्रधानमन्त्री पुष्पकमल दाहालको भारत भ्रमणका क्रममा बिहीबार (जेठ १८ गते) दीर्घकालीन विद्युत व्यापार गर्न दुई देशबीच सम्झौता भएको हो ।
दाहालको भारत भ्रमणको क्रममा दुईपक्षीय भेटवार्तापछि आयोजना गरिएको संयुक्त पत्रकार सम्मेलनमा मोदीले १० हजार मेगावाट विद्युत खरिद गरिने उल्लेख गरे । नेपालसँग भएको व्यापार सम्झौताले सो लक्ष्य हासिल गर्न सघाउने उनको भनाइ छ ।
यसैबिच, ६६९ मेगावाटकाे तल्लाे अरुण आंशिक जलाशय जलविद्युत आयाेजना विकास गर्ने गरी भारतीय कम्पनी सतलज विद्युत निगमसँग आयाेजना विकास सम्झौता (पिडिए) मा हस्ताक्षर भएकाे छ । सरकारी स्वामित्वको विद्युत उत्पादन कम्पनीले आवश्यक अध्ययन गरिरहेको ४२६ मेगावाटको फुकोट कर्णाली भारतीय कम्पनी एनएचपीसीकोसमेत लगानीमा निर्माण हुने भएको छ । यो आयोजनाको लागत करिब ६१ अर्ब ८६ करोड रूपैयाँ अनुमान गरिएको छ ।
