ऊर्जा खबर
.jpg)
काठमाडौं । नेपाल विद्युत प्राधिकरणले समयमा प्रसारण लाइन नबनाउँदा रामेछापमा निर्माण सम्पन्न दुई जलविद्युत आयोजनाको १९ मेगावाट विद्युत खेर जाने भएको छ । विद्युत प्रवाह हुने गर्जाङ–खिम्ती प्रसारण लाइन पूरा नहुँदा १२ मेगावाटको उपल्लो खिम्ती र ७ मेगावाटको माथिल्लो खिम्तीको विद्युत खेर जान लागेको हो ।
प्रवर्द्धक हिमालयन ऊर्जा विकास कम्पनीले दुवै आयोजनाको संरचना निर्माणको काम पूरा गरेको छ । आयोजनाको सिभिल संरचना र उपकरण जडानको काम पूरा भइसकेको प्राविधिक तथा आयोजना व्यवस्थापन निर्देशक सरोज कुमार उपाध्यायले बताए । उनका अनुसार अब आयोजनाको संरचनामा पानी भरेर परीक्षण गर्ने तयारी हुँदैछ ।
‘आयोजना परीक्षणका लागि तयारी हुँदैछ । अब चाँडै परीक्षण सुरु गर्छौं,’ उनले ऊर्जा खबरसँग भने, ‘तर, प्राधिकरणले विद्युत जोडिने प्रसारण लाइन निर्माण गरिसकेको छैन । विद्युत खेर जाने अवस्थाले चिन्तित बनाएको छ ।’
उनले आयोजनाको विद्युतगृहदेखि सबस्टेसनसम्मको आवश्यक प्रसारण लाइनको काम अन्तिम चरणमा पुगेको बताए । यो प्रसारण लाइन अबको ३ सातामा पूरा भइसक्ने पनि उनले बताए ।
आयोजना सम्पन्न गर्न ३ अर्ब १५ करोड रुपैयाँ खर्च हुने अनुमान छ । यी आयोजनाबाट उत्पादन हुने विद्युत नेपाल विद्युत प्राधिकरणको गर्जाङ सबस्टेसनमा लगेर जोडिनेछ । यी आयोजनाबाट २०७५ चैतदेखि विद्युत उत्पादन सुरु गर्ने तालिका थियो । तर, प्रसारण लाइनको समस्याकै कारण आयोजनाको निर्माण लम्ब्याउनु परेको कम्पनीले जनाएको छ ।
प्राधिकरणले निर्माण गर्नुपर्ने प्रसारण लाइनको काम आधा मात्रै भएको छ । विद्युत जोडिने गर्जाङ सबस्टेसनको काम पनि बाँकी छ । अहिले प्राधिकरणले चैत्रभित्र प्रसारण लाइन पूरा गर्ने भनिरहे पनि धेरै काम बाँकी रहेकाले सम्भव नभएको उपाध्यायले बताए ।
उपल्लाे र माथिल्लाे खिम्तीकाे जस्ताे समस्या निजी लगानीका दर्जन बढी आयोजनाले खेपिरहेका छन् । केही आयोजना प्रसारण लाइनकाे समस्याकै कारण पूर्ण क्षमतामा चल्न पाएका छैनन् ।
