ऊर्जा खबर
सिन्धुपाल्चोक । सामुदायिक वन विकासका अभियन्ता तथा सिन्धुपाल्चोकको ठोकर्पा सामुदायिक वनका जन्मदाता स्व. निलप्रसाद भण्डारीको नाममा ‘पर्यावरणीय पुरस्कार’ घोषणा गरिएको छ । भण्डारीको पहिलो स्मृति दिवसको अवसरमा १ लाख १ हजार १ सय रुपैयाँ राशीको पुरस्कार घोषणा गरिएको हो ।
भण्डारीकै योगदानलाई निरन्तरता दिने उद्देश्यले ठोकर्पामा वन अनुसन्धान केन्द्र निर्माण सुरु गरिएको छ । सामुदायिक वन तथा जलविद्युत् विकासलाई एक साथ अगाडि बढाउनुपर्नेमा स्व. भण्डारीले अभियान चलाउँदै आएका थिए ।
उनकै योगदानका आधारमा सरकारले ठोकर्पा सामुदायिक वनलाई विश्वकै पहिलो अभियानको रूपमा घोषणा गरेको छ । २०३१ साल फागुन २४ गते तत्कालीन वन सचिव थिरबहादुर रायमाझीले वृक्षारोपण गरेर ठोकर्पा सामुदायिक वनको सुरुवात गरेका थिए । उनले जीवनकालमा गरेका काम तथा योगदान एवं जीवनी समेत समेटिएको पुस्तक प्रकाशित गरिएको छ ।
पछिल्लो समय भण्डारीको अभियानमा सरिक हुँदै आएका उनकै भतिजा तथा जलविद्युत् विकासका अभियन्ता कृष्णप्रसाद भण्डारीले पनि सामुदायिक वन र जलविद्युत् एक साथ अगाडि बढाउनुपर्नेमा जोड दिँदै आएका छन् । निलप्रसादका जेठा छोरा उत्तम भण्डारीले अहिले ठोकर्पा सामुदायिक वनमा पिताको योगदानलाई निरन्तरता दिँदै आएका छन् ।
