४.३ मेगावाटको फेदीखोला जलविद्युत् आयोजनामा राष्ट्रिय वाणिज्य बैंकले लगानी गर्ने

काठमाडौँ । ४.३ मेगावाटको फेदीखोला (थुम्लुङ्ग) जलविद्युत् आयोजनामा लगानी जुटेको छ । फेदीखोला हाइड्रो पावर कम्पनी प्रालिले प्रवर्द्धन गर्न लागेको उक्त आयोजनामा राष्ट्रिय वाणिज्य बैंकले ऋण लगानी गर्ने भएको हो । बिहीबार एक कार्यक्रमका बीच प्रवर्द्धक कम्पनीका प्रबन्ध सञ्चालक प्रकाशचन्द्र दुलाल र बैंकको पूर्वाधार बैंकिङ्ग विभाग प्रमुख दामोदर ज्ञावालीले ऋण लगानी सम्बन्धी सम्झौता पत्रमा हस्ताक्षर गरेका छन् ।  

सम्झौता अनुसार कम्पनीले भोजपुरको साल्पासिलिछो गाउँपालिका वडा नम्बर ६ मा निर्माण गरिरहेको सो आयोजनामा ५० करोड रुपैयाँ राष्ट्रिय वाणिज्य बैंकले ऋण लगानी गर्ने छ । 

प्रबन्ध सञ्चालक दुलालका अनुसार कुल लागत ९४ करोड रहेको यस आयोजनामा कम्पनीले ४४ करोड रुपैयाँ स्वपुँजी (इक्विटी) लगानी गर्ने उल्लेख छ । कम्पनीका अनुसार साउन मसान्तसम्ममा कम्पनीलाई पब्लिक लिमिटेडमा रूपान्तरण गर्ने र स्वपुँजीको ३० प्रतिशतले हुन आउने १३ करोड २० लाख रुपैयाँको आईपीओ चालू आर्थिक वर्षभित्र निष्काशन गर्ने कम्पनीको लक्ष्य छ । 

२०८२ असोजभित्र निर्माण सक्ने लक्ष्य राखिएको आयोजनाका लागि आवश्यक सबै जग्गा खरिद, कन्स्ट्रक्सन पावर जडान, पहुँचमार्ग, गोदाम घर, आवास गृह आदिको निर्माण सम्पन्न भएको उनले बताए । सिभिल संरचना निर्माणको ठेक्का सम्झौता सम्पन्न भई अहिलेसम्म करिब ३० प्रतिशत काम सकिएको कम्पनीले जनाएको छ ।