३ किलोमिटर लामो लुम्बिनी केबलकार माघदेखि सञ्चालनमा आउने

काठमाडौं । रुपन्देही जिल्लाको बुटवल उपमहानगरपालिकाको बमघाटदेखि पाल्पा जिल्लाको तनहुँ गाउँपालिकाको बसन्तपुर डाँडासम्म निर्माणधिन लुम्बिनी केबलकार आगामी माघ महिनादेखि सञ्चालनमा आउने भएको छ ।

हालै सम्पन्न कम्पनीको विशेष साधारणसभामा प्रगति प्रतिवेदन प्रस्तुत गर्दै केबलकारको निर्माण आगामी पौषभित्र सम्पन्न भई माघ १ गतेदेखि सञ्चालनमा आउने कम्पनीका अध्यक्ष चन्द्रप्रसाद ढकालले बताए । केबलकारको यात्रापछि पुगिने बसन्तपुर डाँडामा सुविधासम्पन्न होटल, मनोरञ्जन पार्क तथा मन्दिरसहितका संरचनाहरु निर्माण हुनेछन् ।

‘केवलकारको तल्लो स्टेसनसम्म पुग्ने करिब ४०० मीटर पहुँचमार्गको निर्माण कार्य सम्पन्न भएको छ’, उनले भने, ‘तल्लो स्टेसनको सव–इस्टक्चरको निर्माण कार्य करिव सम्पन्न भई सुपर स्टक्चरको कार्य र साईट डेभलपमेन्टको काम भइरहेको छ, ९ वटा टावरमध्ये ८ वटा टावरको सिभिल निर्माण कार्य सम्पन्न भइसकेको छ ।’

माथिल्लो स्टेसनमा सव–इस्टक्चरको कार्य अन्तिम चरणमा रहेको र केबलकारको उपकरण आयात गर्ने काम अगाडि बढेको पनि ढकालले बताए । माथिल्लो स्टेसनमा रहेको मन्दिरक्षेत्रको निर्माण कार्य पनि केबलकार परियोजना सँग–सँगै सम्पन्न गर्नुपर्ने भएकोले हाल कार्यरत निर्माण कम्पनीलाई नै पुरानै सर्त बमोजिम कार्य प्रारम्भ गर्न निर्देशन दिइएकोे छ ।

माथिल्लो स्टेसनमा प्रस्तावित होटललाई अन्तराष्ट्रिय चेन–होटलसँग आबद्ध गराउन अन्तराष्ट्रिय परामर्शदाताहरूसँग छलफल भइरहेको ढकालले बताए । केबलकारको काम २०७७ फागुन १ गते पूर्वप्रधानमन्त्री केपी शर्मा ओलीले शिलन्यास गरेका थिए ।