ऊर्जा खबर
काठमाडौँ । अन्तर्राष्ट्रिय बजारमा पेट्रोलियम पदार्थको मूल्यमा गिरावट आएपछि नेपाल आयल निगमले समेत पेट्रोल, डिजेल तथा एलपी ग्यासको मूल्य घटाएको छ । निगमका अनुसार भारतीय आयल कर्पोरेसनबाट प्राप्त नयाँ खरिद मूल्यका आधारमा स्वचालित मूल्य प्रणालीअनुसार बुधबारदेखि लागु हुने गरी मूल्य समायोजन गरिएको हो ।
निगमका अनुसार पेट्रोलको मूल्य प्रतिलिटर २० रुपैयाँ, डिजेल/मट्टीतेलको मूल्य प्रतिलिटर ३० रुपैयाँ र एलपी ग्यासको मूल्य प्रतिसिलिन्डर १०० रुपैयाँले घटाइएको छ । यससँगै पहिलो, दोस्रो र तेस्रो वर्गका लागि पेट्रोलको नयाँ मूल्य क्रमशः १९४.५०, १९६ र १९७ रुपैयाँ प्रतिलिटर पर्ने भएको छ । त्यसैगरी, डिजेल/मट्टितेलको मूल्य पहिलो, दोस्रो र तेस्रो वर्गमा क्रमशः १९२.५०, १९४ र १९५ रुपैयाँ प्रतिलिटर तोकिएको छ । एलपी ग्यासको मूल्य प्रतिसिलिन्डर २ हजार ३० रुपैयाँ कायम गरिएको निगमले जनाएको छ ।
हवाई इन्धनको मूल्य आन्तरिकतर्फ प्रतिलिटर ४० ले घटाएर २२९ रुपैयाँ कायम गरिएको छ । अन्तर्राष्ट्रिय उडानतर्फ काठमाडौँका लागि हवाई इन्धनको मूल्य प्रतिकिलोमिटर अमेरिकी डलर १ हजार ५६६ रुपैयाँ कायम गरिएको छ । पोखरा र भैरहवाका लागि भने ब्रेकइभेन प्वाइन्टका आधारमा कायम रहेको बिक्री मूल्य यथावत् राखिएको निगमले जनाएको छ । नयाँ मूल्य निगमको डिपो तथा कार्यालयबाट १५ किलोमिटरसम्मको दूरीभित्र मात्र लागु हुने जनाइएको छ ।
अन्तर्राष्ट्रिय बजार मूल्य र भारतीय आयल कर्पोरेसनबाट प्राप्त हुने खरिद मूल्यका आधारमा स्वचालित मूल्य प्रणालीअनुसार आगामी दिनमा पनि आवश्यकताअनुसार मूल्य समायोजन गरिने निगमले जनाएको छ ।
