ऊर्जा खबर
काठमाडौं । संखुवासभाको मकालु गाउँपालिकामा भारतीय कम्पनी सतलज जलविद्युत निगम (एसजेभीएन) ले निर्माण गरिरहेको ९०० मेगावाटको अरुण-३ जलविद्युत आयोजनाका लागि थप जग्गा अधिग्रहण प्रक्रिया अघि बढेको छ । आयोजनाका लागि थप जग्गा आवश्यक पर्ने भएकोले अधिग्रहण प्रक्रिया अघि बढाइएको हो ।
जिल्ला प्रशासन कार्यालय संखुवासभाले साेमबार (बैशाख १८ गते) सूचना सार्वजनिक गर्दै आयोजनाका लागि चाहिने थप जग्गा अधिग्रहण प्रक्रिया अघि बढाएको जानकारी दिएकाे हो । मकालु गाउँपालिका (साविक पाथीभरा गाउँपालिका) –३ को जग्गा स्थायी रुपमा अधिग्रहण गर्न लागिएको छ ।
पाखो जग्गाका लागि प्रतिरोपनी ५ लाख रुपैयाँ, बारीको लागि ७ लाख ५ हजार रुपैयाँ, खेतका लागि ८ लाख रुपैयाँ प्रतिरोपनी जग्गा अधिग्रहण गर्ने प्रक्रिया अघि बढेको छ ।
प्रशासन कार्यालयले सम्बन्धी जग्गाधनीहरूलाई ३५ दिनभित्र रीतपूर्वक निवेदन दिन आग्रह गरेको छ । यो आयोजनाको करिब ६५ प्रतिशत काम पूरा भएको छ । आयोजनाको सबै काम पूरा गरेर आगामी वर्षदेखि विद्युत उत्पादन सुरु गर्ने प्रवर्द्धकको लक्ष्य छ ।
