ऊर्जा मन्त्रालयको हटलाइनमार्फत मासिक २ हजार गुनासा दर्ता, तत्काल सम्बोधन भएपछि सन्तुष्ट बन्दै सेवाग्राही

काठमाडौँ । ऊर्जा, जलस्रोत तथा सिँचाइ मन्त्रालयले सञ्चालनमा ल्याएको हटलाइन सेवा (११५१) प्रभावकारी बन्दै गएको छ । उक्त सेवाका आफ्नो गुनासा तथा समस्याको सम्बोधन भएको भन्दै नागरिक सन्तुष्ट भएको पाइएको हो । काममा अनावश्यक ढिलासुस्ती, पूर्वसूचना बिना नै बत्ती काट्ने, मिटर नपाउने, ट्रान्सफर्मर जल्ने, अनियमित मिटर रिडिङ तथा अनावश्यक झन्झट जस्ता ऊर्जासँग सम्बन्धित नागरिकका विभिन्न गुनासा र समस्याबारे जानकारी लिई समाधान गर्नका लागि उक्त हटलाइन सेवा सञ्चालनमा ल्याइएको थियो । 

मन्त्रालयको निर्देशनअनुसार हटलाइनमा आएका गुनासोलाई यथाशक्य चाँडो सम्बोधन गर्न समन्वय गर्ने गरिएकोले नागरिकमा यस सेवाप्रति सन्तुष्टि बढेको मन्त्रालयले जनाएको छ । ऊर्जा, जलस्रोत तथा सिँचाइ मन्त्री दिपक खड्काले हटलाइन सेवाको प्रभावकारिता बढाउन निर्देशन दिएसँगै गुनासो टिपाउने तथा समाधान गराउने कार्य झन् प्रभावकारी भएको हटलाइन शाखाका कर्मचारीहरूले बताएका छन् ।

नागरिकको सहजताका लागि मन्त्रालयले हटलाइन सेवालाई चौबिसै घण्टा सञ्चालन गरिरहेको छ । जसअन्तर्गत तीन सिफ्टमा कर्मचारी खटिएका छन् । हटलाइन सेवाका प्रमुख रामकृष्ण पौडेलका अनुसार गुनासो आउने बित्तिकै सम्बन्धित कार्यालय र वितरण केन्द्रका प्रमुखलाई जानकारी दिइन्छ र समाधानका लागि तत्काल कदम चालिन्छ ।

गुनासो र समाधानका प्राथमिकता हटलाइन सेवा मार्फत गत फागुनमा १ हजार ९०२ वटा उजुरी दर्ता भएका छन् । भने चालु महिना चैत्रमा मात्र पनि १ हजारभन्दा बढी गुनासो दर्ता भएको मन्त्रालयले जनाएको छ । 

‘आएका गुनासा तथा उजुरीमध्ये धेरैजसो ट्रान्सफर्मर जलेको, पोल ढलेको, विद्युत् आपूर्तिमा अवरोध भएको, भोल्टेज कम भएको जस्ता विषयमा रहेका छन्,’ हटलाइन सेवामा कार्यरत सुपरभाइजर एकबहादुर महर्जनले भने, ‘ट्रान्सफर्मर फेर्ने, क्षमता घटबढ, आगलागीलगायतका समस्याहरू पनि दर्ता गराइएका छन् ।’

फेसबुक, भाइबर लगायतका डिजिटल माध्यमबाट पनि सेवाग्राहीहरूले गुनासो गर्ने गरेका छन् । हटलाइमार्फत केही उजुरी बायोग्यास तथा वैकल्पिक ऊर्जा, जल तथा मौसम, विद्युतीय सवारी (इभी) चार्जिङलगायतका विषयमा पनि आउने गरेको महर्जनले बताए ।

‘चुहावट नियन्त्रणमा पनि प्रभावकारी हटलाइन हटलाइन सेवामा विद्युत् चुहावटसम्बन्धी जानकारी प्राप्त भएपछि उजुरीकर्ताको परिचय गोप्य राखी सम्बन्धित निकायलाई निर्देशन दिइने गरिएको छ,’ महर्जनले भने, ‘यसबाट विद्युत् चुहावट नियन्त्रणमा सकारात्मक प्रभाव परेको छ ।’

बढी गुनासो बागमती र मधेसबाट

मन्त्रालयको हटलाइन सेवामा बागमती र मधेस प्रदेशबाट सबैभन्दा बढी गुनासो प्राप्त भएको छ। यी क्षेत्रहरूमा विद्युत् आपूर्तिका समस्याहरूलाई सम्बोधन गर्न थप जनशक्ति परिचालन गरिएको छ । हटलाइन सेवामा कार्यरत रामकृष्ण पौडेल, एकबहादुर महर्जन, भूपराज खनाल, भैरव चन्द, धर्मकुमारी लामिछाने, मैना थापा, गीता विष्ट लगायतका कर्मचारीहरूले निरन्तर सेवा दिइरहेका छन् ।

मन्त्रालयमै सिधै गुनासो गर्न पाउने व्यवस्था भएपछि जिल्लास्थित कार्यालयमा हुने ढिलासुस्ती हाल हट्दै गएको उपभेक्ताहरू बताउँछन् । ऊर्जा मन्त्रालयको हटलाइन सेवा विस्तार र प्रविधिमा आधारित प्रभावकारी व्यवस्थापनका कारण नागरिकहरूको विश्वास बढ्दै गएको छ । सेवाग्राहीहरूको गुनासो तुरुन्त सम्बोधन गर्न सकिने भएकाले मन्त्रालयले आगामी दिनमा पनि सेवा अझ परिष्कृत गर्दै लैजाने जनाएको छ ।