ऊर्जा खबर
काठमाडौं । रामेछापको लिखु खोलामा ५२.४ मेगावाटको लिखु–४ जलविद्युत आयोजना निर्माण गरी सञ्चालनमा ल्याएकाे ग्रीन भेन्चर्स लिमिटेडले करिब ९ करोड रुपैयाँ खुद नाफा कमाएको छ । कम्पनीले सार्वजनिक गरेको गत आर्थिक वर्ष २०७८/७९ को वित्तीय विवरणमा नाफा कमाएको देखिएको हाे ।
अघिल्लो आव २०७७/७८ मा घाटामा रहेको कम्पनीले गत आर्थिक वर्षमा ९ करोड १९ लाख ७७ हजार ८ सय ३६ रुपैयाँ खुद नाफा कमाएको कम्पनीले जनाएको छ । कम्पनीका अनुसार अघिल्लो आवमा ९७ लाख ९९ हजार ८ सय ४५ रुपैयाँले घाटामा थियो ।
कम्पनीले यो अवधिमा विद्युत बिक्रीबाट ९४ करोड ४३ लाख ४३ हजार ८ सय ४७ रुपैयाँ आम्दानी गरेको छ । यस्तै, कम्पनीको नाफा बढे पनि अन्य स्रोतबाट हुने आम्दानी भने घटेको छ । गत आवमा कम्पनीले ५ करोड ९१ लाख २२ हजार ९ सय १० रुपैयाँ आम्दानी गरेको छ भने अघिल्लो आवमा ४८ करोड ९६ लाख ८ हजार ९ सय २० रुपैयाँ आम्दानी गरेको थियो ।
कम्पनीको रामेछापको लिखु नदीमा निर्माण गरेको लिखु–४ जलविद्युत आयोजना सम्पन्न भई सञ्चालनमा आइसकेको छ ।
