ऊर्जा खबर
काठमाडौँ । भदौ १० गते भोटेकोसी नदीमा आएको अप्रत्याशित बाढीका कारण नेपाल विद्युत् प्राधिकरणअन्तर्गत चिलिमे-त्रिशूली २२० केभी प्रसारण लाइन आयोजनामा कार्यरत सिभिल इन्जिनियर निराजन पंगेनीसहित १९ जना सम्पर्कविहीन भएका छन् । उक्त दिन बिहान ९:२५ बजेदेखि उनीसहित गाडीमा सवार ३ जना बेपत्ता भएका हुन् ।
आयोजना प्रमुख शुभारम्भविक्रम शाहका अनुसार इन्जिनियर पंगेनी, ठेकेदारतर्फका इन्जिनियर देवेश भट्टराई र गाडी चालक सञ्जु चौधरी चढेको बागमती प्रदेश ०१०२५ च ६४९१ नम्बरको टाटा मोटर्सको गाडी हराएको छ । नुवाकोटको बेत्रावतीदेखि बटार आसपासको क्षेत्रमा अन्तिम पटक देखिएको सूचना प्राप्त भएको उनले बताए ।
बेत्रावतीबाट स्वयम् इन्जिनियर पंगेनीसहितको टोलीले सकुशल स्थानतर्फ पठाएका केही व्यक्तिसँगको कुराकानीका आधारमा उनीहरू सोही क्षेत्र वरपर रहेको पुष्टि भएको छ । आयोजनाको किसपाङ–५, पहिरेबेँसीस्थित त्रिशूली ३बी हब सबस्टेसनदेखि शान्तिबजार जाने क्रममा उनीहरू सम्पर्कविहीन भएको जनाइएको छ ।
उनीहरूसँगै ठेकेदार कम्पनीका १६ जना श्रमिक (लेबर) हरू पनि सोही क्षेत्रबाट बाढीका कारण सम्पर्कविहीन छन् । उनीहरूको खोजी कार्य तीव्र पारिएको भए पनि हालसम्म कुनै जानकारी फेला पर्न नसकेको शाहले बताए । साथै, खोजी तथा उद्धारका प्राधिकरणले अपील गरेको छ ।
