ऊर्जा खबर
काठमाडौं । बझाङ जिल्लाको सुनीगाड खोलामा अघि बढेकाे १४ मेगावाटको माथिल्लो सुनीगाड जलविद्युत् आयोजनाको काम ५ वर्षमा सम्पन्न हुने भएको छ । ओमेगा इनर्जी डेभलपर प्राइभेट लिमिटेडले आयोजनाकाे निर्माण २०८५ बैशाखभित्र सम्पन्न गर्ने लक्ष्य राखेको हो ।
जिल्लाको सुर्मा गाउँपालिका र तलकोट गाउँपालिका भएर बग्ने सुनी खोलाको पानी प्रयोग गरी आयोजना निर्माण गर्न लागेको कम्पनीले जनाएको छ । कम्पनीले आयोजना काम अघि बढाउन विद्युत् विकास विभागमा आवेदन दिएको छ । विभागबाट स्वीकृत प्राप्त हुने लगतै आयोजनाको काम अघि बढाउने पनि कम्पनीले जानकारी दिएको छ ।
विभागले आयोजना निर्माण तथा सञ्चालन गर्दा पर्नसक्ने प्रतिकुल असरबारे सम्बन्धित सरोकारवालासँग राय/सुझाव माग गरेको छ । विभागले ३५ दिने सूचना जारी गर्दै उक्त अवधिभित्र सूझाव दिन माग गरेको हो ।
पिकिङ रन अफ रिभर प्रकारको आयोजनाको डिजाइन बहाव ५.५० घनमिटर प्रति सेकेन्ड र कुल हेड मिटर रहने अध्ययनले देखाएको छ । आयोजनाको मूख्य संरचनाहरू सुनीगाड खोलाको दायाँ किनारमा पर्दछन् ।
खोलामा बाँध बाधी खोलाको दायँपट्टि निर्माण हुने इन्टेकबाट पानी फकाई पानीलाई मूख्य संरचनाहरू हुँदै विद्युत्गृहमा लगिनेछ र तत्पश्चात टेलरेस क्यानल मार्फत पानीलाई सुनीगाड खोलामा पठाइनेछ । ३० मिटर लम्बाई १५.० मिटर चौडाई भइका् विद्युत्गृहमा २ वटा पेल्टन टर्वाइनहरूमा पानी खसाली सो टवाईनसँग जोडिएको २ वटा ७४५० केभीएको ३ फेज जेनेरेटर मार्फत विद्युत् उत्पादन गरिने कम्पनीले जानकारी दिएको छ । आयोजनाबाट वार्षिक सरदर ७८.९१ गिगावाट घण्टा विद्युत् उत्पादन हुनेछ ।
उत्पादित विद्युत्लाई ३३ केभी डबल सर्किट प्रसारण लाइन मार्फत २० किलोमिटर लामो दुरीमा रहेको ४०० केभीए क्षमताको बझाङचैनपुर सबस्टेसनमा जोडिनेछ । आयोजना निर्माण तथा सञ्चालन गर्दा भू–क्षय वायू प्रदुषण आदिद्वारा वातावरणमा उल्लेखनीय प्रतिकुल असर नपर्ने गरी निर्माण गरिनेछ ।
