सामलिङ्ग पावर कम्पनीले साउन २२ गतेदेखि साधारण सेयर निष्कासन गर्ने

काठमाडौं । सामलिङ्ग पावर कम्पनी लिमिटेडले साउन २२ गतेदेखि साधारण सेयर निष्कासन गर्ने भएको छ । कम्पनीले इलाममा निर्माणाधीन ९.५१ मेगावाटको माइबेनी खोला जलविद्युत आयोजना प्रभावित क्षेत्रका वासिन्दाहरुका लागि छुट्याएको सेयर निष्कासन गर्न लागिएको हो ।

सय रुपैयाँमा अंकित ५ करोड रुपैयाँ बराबरको ५ लाख कित्ता सेयर निष्कासन गर्न लागिएको कम्पनीले जनाएको छ । कम्पनीका अनुसार निष्कासन हुने सेयरमध्ये ६० प्रतिशत अर्थात ३ लाख कित्ता आयोजना प्रभावित क्षेत्र ईलाम जिल्लाभरीका बासिन्दाहरुका लागि र बाँकी ४० प्रतिशत अर्थात २ लाख कित्ता आयोजना अति प्रभावित क्षेत्र ईलाम नगरपालिका वडा नम्बर ८ र १० तथा माईजोगमाई गाँउपालिका वडा नम्बर ४ र ५ का बासिन्दाहरुका लागि छुट्याइएको छ ।

स्थानीयले छिटोमा भदौ ४ गतेसम्म र ढिलोमा भदौ २० गतेसम्म आवेदन दिन सक्नेछन् । लगानीकर्ताले न्यूनतम १० कित्तादेखि अधिकतममा २० हजार कित्ताका लागि आवेदन दिन सक्नेछन् ।

आवेदकले नेपाल एसबिआई, एनएमबि, सिद्धार्थ, सिभिल र लक्ष्मी बैंकका ईलाम शाखा कार्यालयबाट आवेदन दिन सक्नेछन् । कम्पनीको सेयर निष्कासन तथा बाँडफाँड गर्न नेपाल एसबिआई मर्चेण्ट बैंकिङ्ग लिमिटेडलाई बिक्री प्रबन्धक तोकिएको छ । कम्पनीले निर्माण गरिरहेको आयोजनाको काम अन्तिम चरणमा पुगेको छ ।