डिप बाेरिङका लागि आवश्यक विद्युत् पूर्वाधारको अवस्थाबारे बुझ्न प्राधिकरण नेतृत्व टोली मधेशमा

काठमाडौँ । लामो खडेरीका कारण सुख्खाग्रस्त क्षेत्र घोषणा भएको मधेश प्रदेशमा विद्युत् प्रसारण तथा वितरणको अवस्था बुझ्न कार्यकारी निर्देशक हितेन्द्रदेव शाक्य सहितको टोली मधेश प्रदेश पुगेको छ । कार्यकारी निर्देशक शाक्यले मधेश प्रदेश अन्तर्गतका वितरण केन्द्र प्रमुखहरूसँग छलफल तथा अन्तरक्रिया गरी सुख्खा खडेरीबाट देखिएको सङ्कटमा आम सर्वसधारणलाई राहत हुने गरी सिँचाइ विद्युतीकरणका कामबारे सुझाव लिएका थिए ।

प्रधानमन्त्री केपी शर्मा ओलीले मधेश प्रदेशका विभिन्‍न जिल्लामा ५०० डिप ट्युबबेल जडान गर्ने घोषणा गरेको सन्दर्भमा उक्त ट्युबबेल सञ्‍चालनका लागि चाहिँने विद्युतीय पूर्वाधारको निर्माण के कसरी गर्न सकिन्छ भनी जानकारी लिएका थिए ।

सिँचाइ तथा खानेपानीको समस्या समाधानका लागि प्राधिकरण सारथी हुने तर त्यसका लागि सरकारले आवश्यक बजेट व्यवस्थापन गरिदिनुपर्ने शाक्यले बताए । प्राधिकरणका कारण संकटमा समस्या नबढोस् भनेर आफैँ फिल्डमा पुगेर वास्तविकताको बारेमा जानकारी लिएको शाक्यले बताए ।