ऊर्जा खबर
काठमाडौं । नेपाल विद्युत् प्राधिकरणले सडक बत्तीको विद्युत् महसुल भुक्तानी गर्न र मिटर जडान गर्न स्थानीय तहहरूलाई ताकेता गरेको छ । प्राधिकरणले बुधबार सूचना जारी गर्दै स्थानीय तहहरूलाई ७ दिनभित्र बक्यौता महसुल बुझाउन ताकेता गरेको हो ।
स्थानीय निकायहरूलाई सडक बत्तीकाे विद्युत् उपभोग गरेवापत बक्यौता महसुल भुक्तानी गर्न र बिना मिटर विद्युत् उपभोग गरेको सडक बत्तीका लागि रीतपूर्वक मिटर जडान गराउन प्राधिकरणले आग्रह गरेको छ ।
प्राधिकरणले मिटर जडान गर्न बाँकी रहेका सडक बत्तीहरूका लागि सम्बन्धित वितरण केन्द्रमा सम्पर्क गरी मिटर जडान गर्न तथा सडक बत्ती बापतको वक्यौता महसुल बुझाउन ७ दिने सूचना जारी गरेकाे छ ।
७ दिनभित्र सडक बत्तीका लागि मिटर लिई ग्राहक नबनेमा त्यस्ता बिना मिटरका सडक बत्तीहरू वितरण केन्द्रबाट हटाउने प्राधिकरणले चेतावनी दिएको छ । त्यस्तै, प्राधिकरणले सडक बत्तीको बक्यौता महसुल नबुझाउने स्थानीय निकायहरूको हकमा नेपाल विद्युत् प्राधिकरण विद्युत् महसुल संकलन विनियमावली २०७८ को विनियम १० को प्रावधान बमोजिम कारबाही गरिने जनाएको छ ।
प्राधिकरणले यसअघि पनि असोज २१ गते ४५ दिनको समयावधि दिई सूचना प्रकाशित गरेको थियो ।
