ऊर्जा खबर
काठमाडौं । सरकारले जलाशय जलविद्युत आयोजनामा लगानी गर्न निजी क्षेत्रलाई आह्वान गरेको छ । अर्थमन्त्री विष्णु पौडेलले शनिबार आर्थिक वर्ष २०७८/७९ को बजेट सार्वजनिक गर्दै अबको आवश्यकता जलाशय जलविद्युत आयोजना भएकाले निर्माणका लागि निजी क्षेत्रलाई प्रोत्साहन हुने गरी लगानी गर्ने वातावरण मिलाइएको बताएका हुन् ।
उनले एउटा जलाशय जलविद्युत आयोजनामा बाँध र विद्युतगृह निर्माण गर्न छुट्टा छुट्टै प्रवर्द्धकले पाउने व्यवस्था बजेटमा गरिएको घोषणा गरे । साथै, निजी क्षेत्रका लागि नेपाल विद्युत प्राधिकरणले निर्माण गर्ने जलाशयको पानीको उपयोग गरी आफ्नो विद्युतगृह तथा अन्य सहायक संरचना निर्माण एवं सञ्चालन गर्न पाउने व्यवस्था पनि बजेटमा गरिएको छ ।
विद्युत प्राधिकरणको जलाशयको पानी उपयोग हुने गरी विद्युतगृह तथा अन्य सहायक संरचना निर्माण एवं सञ्चालन गर्दा निजी क्षेत्रले शुल्क तिर्नुपर्नेछ । जलाशयको बाँधको बहुउपयोग गरी प्रतिफल बढाउन निजी क्षेत्रबाट शुल्क लिइने बजेटमा भनिएको छ ।
