ऊर्जा खबर
दोलखा । यूनिभर्सल पावर कम्पनी लिमिटेडद्धारा सञ्चालित गौरिशंकर गाउँपालिका स्थित तल्लो खारे खोला जलविद्युत केन्द्रमा कार्यरत कर्मचारीमाथि स्थानीय अराजक समूहले कुटपिट गरेको छ । यही चैत १४ गते राती अन्दाजी साढे ११ बजे केन्द्रको बाँध क्षेत्रको हाताभित्र प्रवेश गरी कर्मचारीहरूमाथि आक्रमण गरिएको हो ।
रातीको समयमा मोटरसाइकलमा चंखु निवासी भुवन श्रेष्ठ र केही अराजक समूह अनधिकृतरूपमा कार्यालयभित्र प्रवेश गरी कुटपिट गरेको कम्पनीले जानकारी दिएको छ । कम्पनीका अनुसार कार्यालयमा रहेका कम्प्युटर, सिसिटिभी लगायत भौतिक संरचनामा तोडफोड हुँदा करिब २५ लाख रुपैयाँभन्दा बढीको क्षति पुगेको छ ।
श्रेष्ठ लगायतको समूहले आक्रमणबाट बच्न भाग्दै गरेका कर्मचारीहरूलाई लखेट्दा कर्मचारी विनोद महतलाई समातेर हातपात गरी घाइते बनाएको पनि कम्पनीले जनाएको छ । घाइते महतको अहिले उपचार भइरहेको छ । ज्यान मार्ने नियतले आक्रमण गरेको हुँदा उक्त अराजक समूहमाथि हदैसम्मको कानुनी कारबाहीको माग गरी कम्पनीले स्थानीय प्रहरी प्रशासनमा उजुरी गरेको छ ।
निर्दोष कर्मचारीमाथि ज्यान मार्ने किसिमले आक्रमण हुँदा कर्मचारीहरु भयभित रहेको र शान्ति सुरक्षाको प्रत्याभूति नहुँदा काम गर्ने मनोबल नरहेको आयोजनाका जनसम्पर्क अधिकृत हरि पन्थीले बताए ।
कम्पनीले निर्माणकालदेखि आजसम्म स्थानीय सरोकार समिति र गाउँपालिकासँग समन्वय गरी स्थानीय जनताहरूको सामाजिक आर्थिक विकासमा महत्त्वपूर्ण काम गर्दै आएको छ । स्थानीय तहमा विद्यालय, सिँचाइ, खानेपानी, सडक निर्माण, गुम्बा संरक्षण लगायत कार्यहरूमा आर्थिक सहयोग पुर्याउँदै आएकोमा यस्तो असामाजिक र तोडफोडको कार्य हुनु निन्दनीय रहेको पन्थीको भनाइ छ । कम्पनीले गाउँपालिकासित समन्वय गरी हाल सडक मर्मतको कार्य पनि गरिरहेको जनाइएको छ ।
