ऊर्जा खबर
काठमाडौँ । तनहुँ जिल्लामा निर्माणाधीन १४० मेगावाटको तनहुँ जलविद्युत् आयोजनाको सामाजिक विकास कार्यक्रमअन्तर्गत आयोजना प्रभावित व्यास नगरपालिका–५ बेनीपाटनमा विद्यालय भवन निर्माण गरिएको छ ।
आयोजनाले आफ्नै खर्च एवम् प्राविधिक सहयोगमा नगरपालिकाले उपलब्ध गराएको जग्गामा पराशर माध्यमिक विद्यालयको २ तले ८ कोठा भएको पक्की भवन निर्माण गरेको हो । आयोजनाबाट निर्माण गरिएको भवन माघ १४ गते विद्यालयको ३३औँ स्थापना दिवस तथा अभिभावक भेलाको अवसरमा हस्तान्तरण एवम् उद्घाटन गरिएको थियो ।
विद्यालय भवन नगरपालिकाका प्रमुख वैकुण्ठ न्यौपानेलाई हस्तान्तरण गरिएको आयोजनाले जानकारी दिएको छ । शिक्षा, विज्ञान तथा प्रविधि मन्त्रालयअन्तर्गतको केन्द्रीय आयोजना कार्यान्वयन इकाईले लागू गरेको डिजाइनअनुसार निर्मित भवन भूकम्प प्रतिरोधी एवम् अपाङ्गमैत्री रहेको दाबी गरिएको छ ।
भौतिकरूपमा विद्यालयको पूर्वाधार बलियो र सुरक्षित हुँदा यसको सकारात्मक प्रभाव विद्यार्थी, अभिभावक, विद्यालय व्यवस्थापन समिति, शिक्षकलगायत सबैलाई पर्ने विश्वास गरिएको छ ।
भवन निर्माणका लागि आयोजना र निर्माण व्यवसायी ऐञ्जल पारस जेभीबीच करिब दुई वर्ष अघि १ करोड ३८ लाख २४ हजार रुपैयाँमा ठेक्का सम्झौता भएको थियो । आयोजना प्रभावित क्षेत्र भिमाद नगरपालिका–५ ऋषिङपाटनस्थित दीपक माविको निर्माणाधीन भवनको काम पनि अन्तिम चरणमा रहेको जनाइएको छ ।
सामाजिक विकास कार्यक्रमअन्तर्गत हालसम्म व्यास तथा भिमाद नगरपालिका र ऋषिङ, म्याग्दे तथा बन्दीपुर गाउँपालिकाका आयोजना प्रभावित वडामा ६६ योजना सम्पन्न भएका छन् भने ९ वटा सञ्चालनमा आइसकेका छन् ।
.jpg){kind=spacer}
