निफ्राको ९० करोड ९५ लाख नगद लाभांश पारित

काठमाडौं । नेपाल इन्फ्रास्टक्चर बैंक लिमिटेड (निफ्रा) ले आफ्ना सेयरधनी सदस्यहरूलाई चुक्ता पूँजीको ४.२१०५ प्रतिशत अर्थात करिब ९१ करोड रुपैयाँ नगद लाभांश दिने प्रस्ताव पारित गरेको छ । कम्पनीको मंसिर १० गते (शनिबार) भएको चौथो साधारण सभाले प्रस्ताव पारित गरेको हो ।

चुक्ता पूँजीको २१ अर्ब ६० करोड रुपैयाँको ४.२१०५ प्रतिशत अर्थात ९० करोड ९५ लाख ६८ हजार रुपैयाँ नगद लाभांश साधारण सभाबाट पारित भएको बैंकले जनाएको छ । बैंक तथा वित्तिय संस्था सम्बन्धि ऐन २०७३ को दफा ४७ अनुसार नेपाल राष्ट्र  बैंकबाट स्वीकृत  भई साधारण सभाबाट पारित भएको लाभांस वितरण हुनेछ ।

बैंकको यो लाभांश गत आर्थिक वर्षको तुलनामा घटेको हो । बैंकले गत वर्ष ८.४२ प्रतिशत नगद लाभांश वितरण गरेको थियो । साधारण सभाले आर्थिक वर्ष २०७९/८० को लागि लेखापरीक्षक नियुक्त गरी पारिश्रमिक समेत निर्धारण गरेको छ ।

बैंकले ऊर्जा, सहरी विकास, यातायात लगायत पूर्वाधार परियोजनामा लगानी गर्दै आएको छ । बैंकले स्थापनाको छोटो अवधिमा २२ वटा पूर्वाधार परियोजनामा करिब २७.५० अर्ब रुपैयाँ लगानी गर्ने प्रतिबद्धता जनाएको छ ।