कुलेखानी जलाशय भरिदैँ, सबै ढोका खोल्नुपर्ने हुनसक्ने भएकाले तटीय क्षेत्रबासीलाई सतर्कता अपनाउन आग्रह 

काठमाडौँ । नेपाल विद्युत प्राधिकरणले कुलेखानी जलविद्युत् केन्द्रका सञ्चालन हुने गरेको कुलेखानी जलाशय (इन्द्रसरोबर) केही घण्टामै भरिन लागेको जानकारी दिएको छ । शुक्रबार रातीदेखि भइरेको अति भारी वर्षाका कारण जलाश केही घण्टाभित्रै भरिने भएकोले बाँधको सुरक्षाका लागि बाँधका सबै ढोका खोलेर पानी बगाउनु पर्ने अवस्था आउन सक्ने र यसले कुलेखानी नदी तथा बागमती नदीमा बाढी आउने सम्भावना भएकोले सतर्कता अपनाउन प्राधिकरणले तटीय क्षेत्रका स्थानीयवासीलाई आग्रह गरेको छ । 

साथै इन्द्रसरोबर गाउँपालिकाले पनि कुलेखानी नदी आसपास घर भएका वडा नं. २ र ३ का स्थानीयलाई सतर्कता अपनाउन आग्रह गर्दै सूचना जारी गरेको छ । 

त्यस्तै, राष्ट्रिय विपद् जोखिम न्यूनीकरण तथा व्यवस्थापन विभागले समेत सूचना जारी गरी कुलेखानी नदी आसपासका स्थानीय, तल्लो तटीय क्षेत्र आसपासका स्थानीय तथा सर्लाही र रौतहट जिल्लाको बागमती नदी आसपासका स्थानीयलाई सतर्कता अपनाउन आग्रह गरेको छ । 

यो जलाशयको पानीबाट ६० मेगावाटको कुलेखानी प्रथम, ३२ मेगावाटको कुलेखानी दोस्रो र १४ मेगावाटको कुलेखानी तेस्रो गरी १०६ मेगावाट बिजुली उत्पादन हुँदै आएको छ ।