ऊर्जा खबर
रसुवा । रसुवाको लाङटाङ खाेलामा निर्माणाधीन २० मेगावाटको लाङटाङ जलविद्युत् आयोजनाको मुख्य सुरुङ निर्माण सकिएको छ । आयोजनाले तीन दशमलव आठ किलोमिटर लामो सुरुङ छेडिएकाे (वारपार) भएकाे हाे ।
गोसाइकुण्ड गाउँपालिका–५ स्याफ्रुबेँसीस्थित लाङटाङ खोलामा रहेको विद्युत्गृहसम्म सुरुङ निर्माणकाे काम सकिएकाे निर्माण कम्पनी आरएम समूहका सचिव जनार्दन अर्यालले जानकारी दिए । दुई वर्षअघि कोभिड महामारीका बेला आयोजना निर्माणकाे काम सुरु भएको थियो ।
आयोजनाको सुरुङ विद्युतगृह निर्माण र हाइड्रो मेकानिकल तथा इलेक्ट्रोमेकानिकल उपकरण आपूर्तिको काम भइरहेको तथा सामान आएलगत्तै जडान सुरु हुने अर्यालले बताए । अहिलेसम्म आयोजनाको भौतिक प्रगति ८० प्रतिशत र वित्तीय प्रगति ६५ प्रतिशत पुगेको छ ।
आयोजनाको सबै प्याकेजको निर्माण वाइवा इन्फ्राटेकले गरिरहेको छ । लक्ष्मी सनराइज बैंकको नेतृत्वमा कुमारी र सिद्धार्थ बैंक तथा आरएम समूहको लगानीमा आयोजनाको वित्तीय व्यवस्थापन गरिएको छ ।
२ अर्ब ७३ करोड रुपैयाँ लागत अनुमान गरिएकाे आयोजनामा सनराइज बैंकले एक अर्ब ५० करोड, सिद्धार्थ बैंकले ५४ करोड, कुमारी बैंकले ३० करोड रुपैयाँ र बाँकी आरएम समूहले लगानी गर्ने गरी वित्तीय व्यवस्थापन भएको थियाे । एक वर्षभित्र आयोजना निर्माण सम्पन्न गरी उत्पादित बिजुली राष्ट्रिय प्रसारण प्रणालीमा जोड्ने लक्ष्य रहेकाे समूहका अध्यक्ष कृष्णप्रसाद आचार्यले जानकारी दिए ।
