ऊर्जा खबर
काठमाडौँ । नेपाल विद्युत प्राधिकरणले नुवाकोटमा विद्युत् आपूर्ति नियमित गर्न विभिन्न स्रोतबाट करिब ७ मेगावाट विद्युत् प्रणालीमा प्रवाह गरेको छ । बाढीका कारण विद्युत् संरचनामा क्षति पुगेपछि अवरुद्ध विद्युत् सेवा पुनःस्थापित गर्न प्राधिकरणले वैकल्पिक व्यवस्थामार्फत विद्युत् उपलब्ध गराएको हो ।
प्राधिकरणका कामु कार्यकारी निर्देशक दीर्घायुकुमार श्रेष्ठका अनुसार काठमाडौँको चपली सबस्टेसनबाट २ मेगावाट, सिन्धुपाल्चोकको इन्द्रावतीबाट १ मेगावाट, समुन्द्रटार सबस्टेसन नजिकै रहेको तादी जलविद्युत् केन्द्रबाट २ मेगावाट र बालाजु सबस्टेसनदेखि त्रिशूलीसम्मको प्रणालीमार्फत थप २ मेगावाट विद्युत् नुवाकोटमा पठाइएको छ ।
हाल पठाइएको विद्युत्ले नुवाकोटको तत्कालीन माग धान्न सक्ने उनले बताए । सामान्य अवस्थामा जिल्लामा करिब १० मेगावाट विद्युत् खपत हुने गरेको भए पनि अहिले करिब ७ मेगावाट आपूर्ति भएपछि अस्पताल, खानेपानी, सञ्चारलगायत अत्यावश्यक सेवा सञ्चालनमा तत्काल समस्या नहुने उनको भनाइ छ ।
विद्युत्को माग क्रमशः बढ्दै गएमा थप आपूर्ति गर्न सकिने गरी प्राधिकरणले आवश्यक तयारीसमेत गरेको जनाएको छ । बाढीका कारण विद्युत्गृहहरूमा क्षति हुँदा १० प्रतिशतभन्दा बढी विद्युत् प्रणालीबाट बाहिर हुँदा विद्युतको माग व्यवस्थापन गर्न चुनौतीपूर्ण रहेको भए पनि प्राधिकरणले देशभर नै विद्युत् आपूर्ति प्रणालीलाई स्थिर र नियमित राख्न सफल भएको श्रेष्ठले बताए ।
बाढीबाट क्षतिग्रस्त संरचनाको पुनःस्थापना तथा वैकल्पिक प्रणालीबाट आपूर्ति विस्तार गर्ने कामलाई प्राधिकरणले निरन्तरता दिएको उनले जानकारी दिए ।
