ऊर्जा खबर
काठमाडौँ । उच्च खपत हुने समय (पिक आवर) मा नेपालकाे कुल ऊर्जा माग ७३ हजार ६२९ मेगावाट घण्टा बराबर पुगेको छ । विद्युत् उत्पादन, प्रसारण र वितरण प्रणाली सुदृढ बन्दै जाँदा नेपालले उक्त माग आन्तरिक उत्पादनबाटै पूरा गरिरहेकाे छ ।
हाल भारतबाट बिजुली आयात शून्य भएकाे नेपाल विद्युत् प्राधिकरणले जनाएको छ । प्राधिकरणका अनुसार हाल भारत र बङ्गलादेशमा गरी कुल २२ हजार १०२ मेगावाट घण्टा बराबर बिजुली निर्यात भइरहेको छ ।
राष्ट्रिय विद्युत् प्रणालीमा निजी ऊर्जा उद्यमीले ४७ हजार ५६३ मेगावाट घण्टा बराबरको बिजुली उपलब्ध गराएका छन् । यस्तै, प्राधिकरणका सहायक कम्पनीले १७ हजार १०८ मेगावाट घण्टा बराबर बिजुली उपलब्ध गराएका छन् । प्राधिकरणका आफ्नै आयोजनाबाट कुल ८ हजार ९५९ मेगावाट घण्टा बराबरको ऊर्जा उपलब्ध भएको छ ।
कुल राष्ट्रिय माग ५१ हजार ५२७ मेगावाट घण्टा बराबर रहँदा साँझको समयमा कुल माग ३ हजार २४८ मेगावाट बराबर रहेको छ । वर्षाका कारण देशभर कुनै पनि स्थानमा अवरोध नरहेको प्राधिकरणले जनाएको छ ।
कुनै स्थानमा अवरोध उत्पन्न हुनासाथ मर्मतसम्भारका लागि सातवटा प्रदेश कार्यालय र काठमाडौँमा प्राविधिकसहितको टोली तयारी अवस्थामा राखिएको समेत प्राधिकरणले जानकारी दिएको छ ।
