ऊर्जा खबर
काठमाडौं । सरकारले आगामी आर्थिक वर्ष (२०७९/८०) का लागि विनियोजन गर्ने बजेटमा ऊर्जा, जलस्रोत तथा सिँचाइ मन्त्रालयका लागि झण्डै १ खर्ब १३ अर्ब रुपैयाँ छुट्टयाएको छ ।
चालू वर्ष १ खर्ब २१ अर्ब ९७ करोड रुपैयाँ बजेट विनियोजन भएकोमा आगामी वर्षका लागि करिब ९ अर्ब रुपैयाँ कम गरेर १ खर्ब १२ अर्ब ९४ करोड रुपैयाँ छुट्ट्याइएको छ । अर्थ मन्त्रालय स्रोतका अनुसार ऊर्जातर्फ ८५ अर्ब ३ करोड ७५ लाख रुपैयाँ र जलस्रोत तथा सिँचाईतर्फ २७ अर्ब ९० करोड २९ लाख रुपैयाँ छुट्याइएको छ ।
विनियोजित बजेटमध्ये चालू खर्च (ऊर्जा) ३ अर्ब २३ करोड २० लाख र १ अर्ब ३५ करोड ४८ लाख रुपैयाँ (जलस्रोत तथा सिँचाइ) विनियोजन गरिएको स्रोतले जनाकारी दिएको छ ।
यसैगरी, पुँजीगततर्फ (ऊर्जा) ११ अर्ब २१ करोड ८६ लाख र २६ अर्ब ५४ करोड ८१ लाख रुपैयाँ (जलस्रोत तथा सिँचाइ) छुट्याइएको छ । ऊर्जाको वित्तीय व्यवस्थातर्फ ७० अर्ब ५८ करोड ६९ लाख रुपैयाँ छुट्याइएको स्रोतले जानकारी दिएको छ ।
सरकारले जलविद्युत, प्रसारण लाइन, नविकरणीय ऊर्जा एवं सिँचाइलगायतका ऊर्जा क्षेत्रको विकासका लागि यति बजेट विनियोजन गरेको छ । सरकारले हरेक वर्ष जेठ १५ गते नयाँ आवको बजेट तथा कार्यक्रम सार्वजनिक गर्दै आएको छ ।
नयाँ वर्षको बजेटमा जलाशय आयोजना पश्चिम सेती र तल्लो अरुण, सेती–६ लाइ उच्च प्राथमिकतामा राखी अगाडी बढाउनेछ । साथै, आउने बजेटमा विद्युत वितरण तथा व्यापारमा निजी क्षेत्रलाई संलग्न गराइनेछ ।
चालू आर्थिक वर्षको १० महिनामा ६३८ मेगावाट विद्युत प्रणालीमा थपिएको र आगामी वर्ष ७१५ मेगावाट थपिने प्रक्षेपण गरिएको छ । अहिलेसम्म केन्द्रीय प्रणालीमा करिब २२०० मेगावाटबराबर जडित क्षमता पुगेको छ ।
