ऊर्जा खबर
काठमाडौं । गोल्यान समूहले प्रवर्द्धन गर्न लागेको ४४१ मेगावाटका दुई आंशिक जलाशययुक्त जलविद्युत आयोजनाको विस्तृत अध्ययन जर्मनीको ट्र्याकटेबेल इन्जिनियरीङ कम्पनीले गर्ने भएको छ । ट्र्याकटेबेलले ३०६ मेगावाटको माथिल्लो मुगु कर्णाली र १३५ मेगावाटको नाम्लाङ खोलाको अध्यययन गर्ने भएको हो ।
यी दुई आयोजनाको विस्तृत इन्जिनियरीङ अध्ययन २० महिनाभित्र सम्पन्न गरी प्रतिवेदन समेत तयार गर्ने गरी सम्झौता भएको छ । माथिल्लो मुगु कर्णालीको प्रवर्द्धक एलिवेट इनर्जी प्रालि र नाम्लाङ खोलाको प्रवर्द्धक एपोलो इनर्जी प्रालि र ट्र्याकटेबेल इन्जिनियरिङबीच सम्झौता भएको छ ।
सम्झौतापत्रमा गोल्यान समूहकोतर्फबाट ऊर्जा डिभिजनका प्रमुख कार्यकारी अधिकृत प्रवीण अर्याल र गोल्यान समूहका प्रबन्ध निर्देशक अक्षय गोल्यान र ट्र्याकटेबेलका तर्फबाट नेपाल शाखा प्रबन्धक कास्टर्न गुनर्टमनले हस्ताक्षर गरे ।
यी दुई आयोजनाको विस्तृत अध्ययन गर्न अमेरिकी वित्तीय संस्था अन्तर्राष्ट्रिय डेभलपमेन्ट फाइनान्स कर्पोरेशन (डिएफसी) बाट आर्थिक अनुदान सहयोग प्राप्त गरिसकेको गोल्यान समूहले जनाएको छ । समूहका अनुसार अमेरिकाले नेपालमा निजी क्षेत्रका जलविद्युत आयोजनाको अध्ययनका लागि भनेर पहिलो पटक अनुदान दिएको हो ।
अप्पर मुगु कर्णाली मुगुको मुगुम कार्मारोङ गाउँपालिका–३ मा प्रस्ताव गरिएको छ । आयोजना पूरा भएपछि सुक्खायाममा पिक ऊर्जा २०९.३९ गिगावाट घन्टा, सुक्खा अफ पिक ऊर्जा २७९.३९ गिगावाट घन्टा र बर्खायाममा ११४०.४७ गिगावाट घन्टा उत्पादन हुनेछ ।
नाम्लाङ खोला पनि मुगु नै निर्माण हुनेछ । आयोजनाबाट सुक्खायाममा २५६. ३७ गिगावाट घन्टा र बर्खायाममा ५१४.८३ गिगावाट घन्टा विद्युत उत्पादन हुनेछ ।
यो समूहले जलविद्युत सँगै सौर्य ऊर्जामा पनि लगानी गरेको छ । सन् २०३० सम्म जलविद्युत र सौर्य गरी ९०० मेगावाट विद्युत राष्ट्रिय प्रसारण प्रणाली जोड्ने गोल्यान समूहको लक्ष्य छ ।
