ऊर्जा खबर
काठमाडौं । नेपालमा उत्पादित विद्युत खपत बढाउने चर्चा व्यापक चलिरहँदा आर्थिक वर्ष (आव) २०७९/८० काे ९ महिनामा साढे १ लाख भन्दा बढी विद्युतीय चुलो आयात भएको छन् । आवको साउनदेखि चैतसम्म उक्त परिमाणकाे विद्युतीय चुलो नेपाल भित्रिएका हुन् ।
चैतसम्ममा १ लाख ६२ हजार ५ सय ७ वटा विद्युतीय चुलो आयात भएको भन्सार विभागको तथ्यांकमा उल्लेख छ । त्यसमध्ये सबैभन्दा बढी इन्डक्सन चुलो रहेको देखिएको छ । ९६ हजार २० वटा इन्डक्सन चुलो र ६६ हजार ४ सय ८७ वटा इन्फ्रारेड चुलो भित्रिएको विवरणमा उल्लेख छ ।
आयात भएको इन्डक्सनमध्ये सबैभन्दा बढी चाइनाबाट आएको तथ्यांकमा देखिएको छ । चाइनाबाट ७९ हजार ४ सय ९७ वटा , भारतबाट भारतबाट १६ हजार ४ सय ५६ वटा, मलेसियाबाट ५० वटा, कतारबाट १४ वटा चुलाे भित्रिएका छन् । यस्तै, युनाईटेड अरब इमिरेटेड, सिंगापुरबाट र युनाइटेड स्टेटबाट १/१ वटा इन्डक्सन चुलो ल्याइएको छ ।
यसैगरी, चाइनाबाट ६४ हजार ४ सय ८७ वटा र भारतबाट २००१ वटा इन्फ्रारेड चुलो ल्याइएको तथ्यांकमा उल्लेख छ । विद्युतीय चुलो प्रयोग गर्दा छिटो छरितो हुने र विजुलीको खपत पनि हुने भएकाले अहिले नेपाली जनाताहरू विद्युतीय चुलो प्रति लक्षित भएका छन् । एलपिजी ग्यास भन्दा सजिलो हुने भएकाले हाल नेपालले विद्युतीय चुलोलाई बढी प्राथमिकता दिएको पाइन्छ ।
