विद्युत प्राधिकरणले ढल्केबर–बालगंगा प्रसारण लाइन २ वर्षमा सम्पन्न गर्ने

काठमाडौं । नेपाल विद्युत प्राधिकरणले १३२ केभी ढल्केबर–बालगंगा डबल सर्किट प्रसारण लाइन निर्माण गर्ने भएको छ । प्राधिकरणले मधेश प्रदेशको धुनषा जिल्लामा लाइन निर्माण गर्न लागेको हो ।

बटेश्वर गाउँपालिकामा निर्माणाधीन ढल्कबर–लोहरपट्टीको १३ नम्बर ए.पी देखि लुपइनलुपआउटमार्फत लक्ष्मीनियाँ, औरही गाउँपालिका, मिथिलाबिहारी नगरपालिका हुँदै हंसपुर नगरपालिकामा निर्माणाधीन बालगंगा सबस्टेसनसम्म डबल सर्किट लाइन निर्माण गर्न लागिएको प्राधिकरणले जनाएको छ । प्राधिकरणका अनुसार करिब २३ किलोमिटर लामो लाइन निर्माण अनुमतिका लागि विद्युत विकासमा आवेदन दिइएको छ ।

विभागले लाइन निर्माण गर्न प्राधिकरणको नाममा अनुमतिपत्र दिने प्रकृया अन्तिम चरणमा पुर्याएको छ । विभागले विद्युत ऐन २०४९ को दफा ४ को व्यवस्था अनुसार विद्युत नियमावली २०५० को नियम १५ बमोजिक प्राधिकरणलाई अनुमतिपत्र दिन लागेको हो ।

प्राधिकरणलाई अनुमतिपत्र दिन विभागले ३५ दिने सार्वजनिक सूचना जारी गरेको छ । विभागले अनुमतिपत्र दिनुअघि लाइन निर्माण तथा सञ्चालन गर्दा पर्न सक्ने प्रतिकुल असरबारे सम्बन्धित सरोकारवालासँग राय/सुझाव मागिएको छ । विभाग तथा प्राधिकरणको कार्यलयमा आइपुग्ने गरी सरोकारवालाबाट राय/सुझाव मागिएको छ ।

२३० मेगावाट विद्युत प्रसारण क्षमता भएको लाइनमा २६ वटा एंगल र ६५ वटा सस्पेन्सन गरी जममा ९१ वटा टावर निर्माण हुनेछन् । एक टावरदेखि अर्को टावरसम्मको दुरी न्युनतम १६५ मिटर र अधिकतम ३५० मिटर हुनेछ ।

लाइन तथा सबस्टेसन निर्माण गर्न स्थायी तथा अस्थायी रुमा करिब ४७.७६४ हेक्टर जग्गा आवश्यक पर्नेछ । आयोजनाको सबै काम २ वर्षभित्र पुरा गर्ने प्राधिकरणले जनाएको छ ।