ऊर्जा खबर
काठमाडौँ । भिजन टेस्ला पावर प्रालिद्वारा प्रवर्द्धित २४.९२१ मेगावाटको इन्दुवा खोला जलविद्युत् आयोजनाको वित्तीय व्यवस्थापन (फाइनान्सियल क्लोजर) सम्बन्धी सम्झौता सम्पन्न भएको छ । आयोजनामा सहवित्तीयकरणमा ऋण लगानी गर्ने गरी सम्झौता पत्रमा हस्ताक्षर भएको हो ।
सम्झौता अनुसार आयोजनाका लागि आवश्यक कुल ऋण लगानीमध्ये राष्ट्रिय वाणिज्य बैंकले २ अर्ब १ करोड र हिमालयन बैंकले २ अर्ब गरी जम्मा ४ अर्ब १ करोड रुपैयाँ ऋण लगानी गर्ने भएका छन् ।
सम्झौता कार्यक्रममा बोल्दै कम्पनीको सञ्चालक समितिका अध्यक्ष राजेन्द्रप्रसाद गौतमले आयोजनालाई ३ वर्षभित्रै निर्धारित लागत र गुणस्तरमा सम्पन्न गर्ने प्रतिबद्धता व्यक्त गरे । सङ्खुवासभा जिल्लाको मकालु गाउँपालिकामा अवस्थित उक्त आंशिक जलाशय आयोजना अब निर्माणको चरणमा प्रवेश गर्ने उनको भनाइ छ ।
वार्षिक १४६.६३१ गिगावाट घण्टा विद्युत् उत्पादन हुने लक्ष्य राखिएको आयोजनाबाट पहिलो वर्षमा प्रतिमेगावाट ३.७० करोड र नवौँ वर्षदेखि प्रतिमेगावाट ४.५९ करोड रुपैयाँ आम्दानी हुने प्रक्षेपण गरिएको छ । आयोजनाबाट उत्पादित विद्युत् नेपाल विद्युत् प्राधिकरणको शीतलपाटी सबस्टेसनमा जोडिने छ ।
कार्यक्रममा लगानीकर्ता बैंकका प्रतिनिधिहरू, आयोजनाका पदाधिकारी तथा सरोकारवालाहरूको उपस्थिति रहेको थियो ।
