ऊर्जा खबर
काठमाडौँ । नेपाल विद्युत् प्राधिकरणले १० मेगावाटसम्म जडित क्षमता भएका जलविद्युत् आयोजनालाई विद्युत् खरिद बिक्री सम्झौता (पिपिए) गर्न बोलाएको छ । प्राधिकरणल् विद्युत् जडान सम्झौता (ग्रिड कनेक्सन एग्रिमेन्ट) भएको रोलक्रमका आधारमा नदी प्रवाही (आरओआर) र आंशिक जलाशय (पिआरओआर) आयोजनाका प्रवर्द्धकलाई पिपिए गर्न बोलाएको हो ।
विद्युत् व्यापार विभागले आवश्यक कागजातहरू र दस्तावेज सहित विभागमा निवेदन पेस गर्न सूचना जारी गरेको छ । यसैगरी, विभागले पिपिए सम्झौता सम्पन्न भइसकेका जलविद्युत् आयोजनाहरूको २५ प्रतिशतसम्म क्षमता अभिवृद्धि भएको भए त्यस्ता आयोजनालाई पनि पिपिए गर्न बोलाएको हो ।
प्राधिकरणको २०८० माघ २४ गते बसेको सञ्चालक समितिको बैंकठले पिपिए खोल्न निर्णय गरेको थियो । बैठकले साना लगानीकर्ताहरूलाई प्रोत्साहन गर्न पिपिए सीमाको अधीनमा नरहने गरी ग्रिड कनेक्सन एग्रिमेन्ट सम्पन्न भएका वा हुने आयोजनाहरूमध्ये १० मेगावाटसम्म जडित क्षमता भएका आरओआर तथा पीआरओआर जलविद्युत् आयोजनाहरूलाई लिउ वा तिर प्रावधानमा पिपिए गर्ने निर्णय गरेको थियो ।
साथै पिपिए सम्झौता सम्पन्न भइसकेका आरओआर तथा पीआरओआर आयोजनाहरूको हकमा बढीमा २५ प्रतिशतसम्म क्षमता अभिवृद्धि हुँदा समेत पिपिएको सीमाको अधीनमा नरहने गरी पिपिए सम्झौता संशोधन गर्ने निर्णय गरेको थियो ।
सोहि निर्णय बमोजिम पिपिए वा पिपिएमा क्षमता वृद्धि गर्नुपरेमा आवश्यक कागजातहरू/दस्तावेज सहित प्राधिकरण, विद्युत् व्यापार विभागमा निवेदन पेस गर्न प्राधिकरणले आग्रह गरेको छ ।
