ऊर्जा खबर
काठमाडौं । काठमाडौं उपत्यकाको महाराजगन्ज र रत्नपार्क क्षेत्रमा स्मार्ट विद्युत मिटर जडान कार्य अन्तिम चरणमा पुगेको छ । नेपाल विद्युत प्राधिकरणको महाराजगन्ज र रत्नपार्क वितरण केन्द्र अन्तर्गतका ग्राहकको घरमा स्मार्ट विद्युत मिटर जडानको काम पूरा हुन लागेको हो ।
अहिलेसम्ममा करिब ९२ हजार ग्राहकको घरमा स्मार्ट विद्युत मिटर जडान कार्य सम्पन्न भइसकेको आयोजना प्रमुख रबिन्द्र श्रेष्ठले बताए । उनका अनुसार महाराजगन्ज वितरण केन्द्र अन्तर्गतका ग्राहकको घरमा स्मार्ट मिटर जडान गर्न कार्य सकिएको छ ।
‘स्मार्ट मिटर जडान कार्य अब सकिने चरणमा पुग्न लागेको छ,’ उनले ऊर्जा खबरसँग भने, ‘रत्नपार्कका केही स्थानका लागि स्मार्ट मिटर अभावले काम केही सुस्त बनेको छ । अरु स्थानमा केही छुटपुटबाहेक सबै ग्राहकको घरमा स्मार्ट मिटर राखिसकेका छौं ।’ उनले पहिले छुटेका ग्राहकको घरमा अहिले स्माट मिटर लगेर जडान गरिरहेको बताए ।
उनले अब थपिने नयाँ ग्राहकका लागि पनि ५ हजार स्मार्ट मिटर छुट्याएको जानकारी दिए । स्मार्ट मिटर जडान भएसँगै रत्नपार्क र महाराजगन्ज क्षेत्रमा खटिने ५० भन्दा बढी मिटर रिडरको संख्या कटौती भई आर्थिक भार कम हुने प्राधिकरणले जनाएको छ ।
स्मार्ट विद्युत मिटर जडान कार्य यसअघि नै सम्पन्न भइसक्नु पर्ने भएता पनि कोरोना (कोभिड–१९) महामारी तथा विविध कारणले लक्ष्यभन्दा ढिलो गरी सम्पन्न हुन लागेको हो । प्राधिकरणले यी दुई वितरण केन्द्र अन्तर्गत ग्राहकको घरमा ९८ हजार स्मार्ट मिटर जडान गर्दैछ । स्मार्ट विद्युत मिटर जडान भएका घरमा प्राधिकरणले एमएमएसमार्फत खपत भएको विद्युत महसुलको बिल पठाउने गरेको छ ।
विद्युत प्राधिकरण आयोजना व्यवस्थापन निर्देशनालयको स्मार्ट मिटररिङ आयोजना अन्तर्गत सञ्चालित स्मार्ट विद्युत मिटर जडान कार्य सम्पन्न गर्न १ अर्ब रुपैयाँ लागत अनुमान गरिएको छ । यो आयोजनाका लागि एसियाली विकास बैंक (एडिबी) ले ऋण लगानी गरेको छ ।
आयोजना अन्तर्गत दोस्रो चरणमा काठमाडौं, ललितपुर र भक्तपुर जिल्लाका सबै वितरण केन्द्रका ग्राहकको घरमा स्मार्ट विद्युत मिटर जडान गर्ने विद्युत प्राधिकरणको योजना छ ।
