ऊर्जा खबर
काठमाडाैं । ऊर्जा डेभलपर्स प्रालि मातहतको एसियन हाइड्रो पावर लिमिटेडले सर्वसाधारणका लागि निष्कासन गरेको साधारण सेयरको बाँडफँड गरेको छ । आज (फागुन १४ गते) धितोपत्र निष्कासन तथा बिक्री प्रबन्धक एनएमबी क्यापिटल लिमिटेडको कार्यालयमा बाँडफाँड सम्पन्न भएको हो ।
गत माघ २७ गतेदेखि फागुन ३ गतेसम्म आवेदन दिन सकिने गरी सर्वसाधारणहरूका लागि कूल ६ लाख ९७ हजार २ सय कित्ता सेयर निष्कासन गरिएकोमा १४ लाख २५ हजार ७ सय २० जना योग्य आवेदकहरूबाट १ करोड ५४ लाख ४५ हजार ८ सय २० कित्ता शेयरका लागि आवेदन परेको थियो । जसमध्ये ६९ हजार ७ सय २० जनाले गोलाप्रथा मार्फत १० कित्ता शेयर प्राप्त गरेको कम्पनीले जनाएको छ ।
कम्पनीले इलाममा निर्माण सम्पन्न गरी व्यापारिक उत्पादनसमेत सुरु गरिसकेको ६.२ मेगावाटको तल्लो जोगमाई खोला जलविद्युत आयोजनाबाट प्रभावित स्थानीयवासी, वैदेशिक रोजगारीमा रहेका नेपालीहरू तथा सामूहिक लगानी कोषका लागि छुट्याइएको आईपीओको बाँडफाँड यसअघि नै सम्पन्न गरिसकेको छ ।
ऊर्जा डेभलपर्स र यससँग सम्बन्धित कम्पनीहरूले सन् २०३० सम्म कूल १००० मेगावाट क्षमताका विद्युत आयोजना विकास गर्ने लक्ष्य लिएको छ ।
