ऊर्जा खबर
काठमाडौँ । अर्बिट इनर्जी लिमिटेडले निर्माण गरिरहेको दुई जलविद्युत् आयोजनामा कुमारी बैंक लिमिटेडको अगुवाईमा ३ बैंकले ऋण लगानी गर्ने भएका छन् । कम्पनीले संखुवासभामा निर्माण गरिरहेको २७.८ मेगावाटका आयोजनामा ३ बैंकले लगानी गर्ने भएका हुन् ।
२१.५ मेगावाटको सभाखोला ‘बी’ र ६.३ मेगावाटको सभाखोला ‘सी’को कूलमध्ये ८० प्रतिशत लगानी बैंकहरूले गर्ने भएको कम्पनीले जानकारी दिएको छ । कुमारी बैंकको अगुवाईमा सिद्धार्थ बैंक र कृषि विकास बैंक गरी ३ बैंकले ३ अर्ब ८६ करोड रुपैयाँ ऋण लगानी गर्नेगरी बिहीबार (माघ ११ गते) सम्झौता भएको कम्पनीले जानकारी दिएको छ ।
दुवै आयोजना सम्पन्न गर्न ५ अर्ब ३५ करोड रुपैयाँ लागत अनुमान गरिएको छ । आयोजनामा ८० प्रतिशत ऋण लगानी र २० प्रतिशत स्वपूँजी लगानी रहनेछ ।
कम्पनीले निर्माण गरिरहेको सभाखोला ‘बी’को ३० प्रतिशत काम पूरा भएको छ । अहिले आयोजनाको बाँध, सुरुङ, विद्युत् गृह सबै क्षेत्रको काम एकसाथ भइरहेको छ । आयोजनामा ३ किलोमिटर लामो सुरुङ निर्माण हुनेछ । अहिलेसम्म ६०० मिटर बढी सुरुङ खन्ने काम सकिएको कम्पनीले जानकारी दिएको छ ।
यसैगरी यही आयोजनाको क्यासकेडको रूपमा सभाखोला ‘सी’ पनि निर्माणाधीन छ । यो आयोजनाको सुरुङ निर्माणको काम सुरु भएको जनाइएको छ । विद्युत् गृहको काम पनि सुरु गर्ने तयारी भइरहेको छ ।
दुवै आयोजनाको काम २०८२ असारभित्र सम्पन्न हुनेछ । दुबै आयोजना पूरा भएपछि वार्षिक १६३.३८ गिगावाट विद्युत् उतपादन हुनेछ । उत्पादीत विद्युत् १८ किलोमिटर दुरीमा रहेको नेपाल विद्युत् प्राधिकरणको सितलपाटी सबस्टेसनमा जोडिनेछ । सबस्टेसनसम्मको आवश्यक १३२ केभी प्रसारण लाइन कम्पनीले आफैले निर्माण गर्नेछ ।
