ऊर्जा खबर
चितवन । नेपाल विद्युत् प्राधिकरण भरतपुर वितरण केन्द्रले १ हजार ३६८ जना ग्राहकको लाइन काटेको छ । समयमा विद्युत् महसुल नबुझाउने ग्राहकको लाइन गत साउनयता काटिएको हो । कार्यालयका प्रमुख ई. रामु श्रेष्ठकाअनुसार साउनदेखि पुस मसान्तसम्म महसुल नतिर्ने उनीहरुको लाइन काटिएको हो । यस अवधिमा १ हजार ४५६ जनाले बक्यौता रकम तिरेका छन् । उनीहरुबाट २ करोड ८२ लाख २१ हजार ९१६ रूपैयाँ राजस्व संकलन भएको छ ।
प्रमुख श्रेष्ठका अनुसार विद्युत महसुल नबुझाउने ति ग्राहकबाट ४ करोड १३ लाख ९५ हजार ५६७ रूपैयाँ बक्यौता उठाउन बाँकी थियो । वितरण केन्द्रले पुस मसान्तसम्म २८१ जना ग्राहकलाई कालोसूचीमा राखेको छ । उनीहरुबाट १ करोड ५ लाख ४६ हजार १८८ रूपैयाँ बक्यौता उठाउन बाँकी छ । वितरण केन्द्र प्रमुख श्रेष्ठले भने, ‘नेपाल विद्युत् प्राधिकरणको प्रचलित विनियमअनुसार ६ महिनासम्म महसुल नबुझाएका ग्राहकलाई कालोसूचीमा राख्ने प्रावधान छ ।’
भरतपुर वितरण केन्द्रमा मासिक महसुल बुझाउने ग्राहकमध्ये ६२ प्रतिशतले अहिले अनलाइनबाट महसुल बुझाउने गरेका छन् । यस केन्द्रमा हाल ७२ हजार बढी ग्राहक छन् ।
