ऊर्जा खबर
काठमाडौं । लामो समयदेखिको बाँकी विद्युत महसुल उठाउन गएका नेपाल विद्युत प्राधिकरणका कर्मचारीमाथि हातपात गर्ने रघु केसीलाई भक्तपुर प्रहरीले पक्राउ गरेको छ । महानगरीय प्रहरी बिट ठिमीबाट खटिएकाे टाेलीले बुधबार बिहान १० बजे केसीलाई पक्राउ गरेर अनुसन्धान प्रक्रिया अघि बढाएकाे हाे ।
प्राधिकरण ठिमी वितरण केन्द्रले उनी विरुद्ध कारबाही प्रक्रिया अघि बढाउनु पर्ने भन्दै जिल्ला प्रशासन कार्यालय र ठिमी प्रहरी कार्यालयमा निवेदन दर्ता गराएपछि केसी पक्राउ गरेका हुन् । उनलाई हिरासतमा लिएर अनुसन्धान प्रक्रिया अघि बढाइएकाे भक्तपुर प्रहरीले जनाएकाे छ ।
ठिमी वितरण केन्द्रले हातपात गर्ने केसी विरुद्ध कारबाहीकाे माग गर्दै निवेदन दर्ता गराएपछि प्रहरीले अनुसन्त्रान थालेकाे मिटर रिडिङ सुपरभाइजर प्रमोद खड्काले जानकारी दिए । उनले हातपात गर्नेबिरुद्ध कारबाही प्रक्रिया अघि बढेकाले पिडित कर्मचारीले अब न्याय पाउने बताए ।
भक्तपुर सिरुटारका ग्राहक केसीले ३१ महिनादेखिको विद्युत महसुल नतिरेपछि प्राधिकरण कर्मचारी विद्युत लाइन काट्न त्यहाँ पुगेका थिए । लाइन काटेर महिसुल उठाउने क्रममा केसीले वितरण केन्द्रबाट गएका कृष्णबहादुर सुवाल, गोविन्द श्रेष्ठ र बाबा ढकालमाथि हातपात गरेका थिए ।
घटनापछि उनले अहिलेसम्मकाे विद्युत महसुल तिरेका छन् । उनले प्राधिकरणलाई विद्युत महसुलबापत २२ हजार रुपैयाँ तिर्न बाँकी थियाे । कर्मचारीले विद्युतको लाइन काटेर महसुल उठाउन खोजेपछि ०१४.१८०३५ ‘ए’ नम्बरका ग्राहक केसीले भाैतिक आक्रमण गरेका थिए ।
प्राधिकरण चुहावट नियन्त्रण नियमावली अनुसार निरन्तर ६० दिनसम्म महसुल नतिरे त्यस्तो ग्राहकलाई कालोसूचीमा राखेर लाइन काट्नुपर्ने व्यवस्था छ । केसीकाे हकमा प्राधिकरणले महसुल उठाउन ढिलाइ गरेकाे देखिन्छ । हरेक महिना वा २/३ महिनामा निरन्तर बिलिङ गरेर बक्यौता उठाएको भए ग्राहक आक्रोसित हुनुपर्ने अवस्था आउँदैनथ्यो ।
याे पनि पढ्नुहाेस्
