ऊर्जा खबर
काठमाडौँ । जल तथा मौसम विज्ञान विभाग मौसम पूर्वानुमान महाशाखाले बागमती र गण्डकी प्रदेशका पहाडी भू–भागका एक–दुई स्थानमा शुक्रबार दिउँसो भारी वर्षाको पनि सम्भावना रहेको जनाएको छ ।
त्यस्तै देशभर साधारणतया बदली रहने र बागमती, गण्डकी, लुम्बिनीसहित सबै प्रदेशका पहाडी भूभागका केही स्थानमा मेघगर्जन तथा चट्याङसहित हल्कादेखि मध्यम वर्षाको सम्भावना रहेको जनाएको छ ।
महाशाखाका अनुसार कोशी प्रदेश लगायत देशका पहाडी भू–भागमा शुक्रबार राती साधारणतया बदली रही बाँकी भू–भागमा आंशिक बदली रहने छ ।
कोशी प्रदेशको तराई र मधेश प्रदेशका केही स्थानमा हावाहुरी चल्ने सम्भावना समेत रहेको छ ।
हाल देशभर मनसुनी वायुको प्रभाव कमजोर रहेको र मनसुनको न्यून चापीय रेखा सरदर स्थानको आसपास रहेको महाशाखाले जनाएको छ ।
