गण्डकी प्रदेशले स्वास्थ्य संस्था र सरकारी कार्यालयमा साैर्य ऊर्जा प्रविधिबाट सेवा दिने

काठमाडौं । गण्डकी प्रदेश सरकारले स्वास्थ्य संस्था वा अत्यावश्यक सरकारी कार्यालयमा साैर्य ऊर्जा प्रविधिबाट विद्युत सेवा दिने भएको छ । प्रदेश सरकारले आगामी आर्थिक वर्ष (२०७८/७९) को बजेटमार्फत विद्युत सेवा उपलब्ध गराउन बजेटकाे व्यवस्था गरेकाे हाे ।

स्वास्थ्य संस्था वा आवश्यक सेवा दिने सरकारी कार्यालयमा साैर्य ऊर्जा प्रणालीबाट २४ सै घण्टा विद्युत सेवा उपलब्ध गराउने घाेषाणा प्रदेश सरकारले गरेकाे छ । साथै, प्रदेश अन्तर्गत रहेको सम्पूर्ण काठेपोललाई स्टील पोलले विस्थापित गर्ने कार्यक्रमलाई निरन्तरण दिन पनि बजेट विनियोजन गरेको छ ।

आगामी आर्थिक वर्षभित्र सबै जिल्लामा विद्युत सेवा पुर्याउने पनि प्रदेश सरकारकाे योजना छ । प्रदेश अन्तर्गत ९३ प्रतिशत विद्युतीकरण भइसकेको छ । नेपाल विद्युत प्राधिकरणसँगकाे सहकार्यमा बाँकी ७ प्रतिशत आगामी आर्थिक वर्षभित्र विद्युतीकरण गर्न बजेट विनियोजन भएको हो ।