ऊर्जा खबर
काठमाडौं । पूर्वजलस्रोत सचिव सूर्यनाथ उपध्याय २०७६ सालको ‘हेम बहादुर मल्ल’ सम्मानबाट सम्मानित भएका छन् । राष्ट्र विकासमा उल्लेखनीय योगदान पुर्याएका व्यक्तिहरूलाई प्रदान गरिने यो सम्मान राष्ट्रपति विद्यादेवी भण्डारीले प्रदान गरेकी हुन् ।
नेपाल जन प्रशासन संघ र साल्ट ट्रेडिङ कर्पोरेशन लिमिटेडले संयुक्तरूपमा स्थापना गरेको नगद २ लाख रुपैयाँ तथा कदरपत्र उपाध्यायलाई जलस्रोत तथा राष्ट्रको सुशासनको क्षेत्रमा विशेष योगदान पुर्याएबापत प्रदान गरिएको हो । स्व. हेमबहादुर मल्लले साल्ट ट्रेडिङमा करिब २५ वर्ष सेवा गरेको र उनको योगदानलाई सम्मान गर्दै २०५९ सालमा सम्मान तथा पुरस्कार स्थापना गरिएको थियो ।
उपाध्यायले लामो समयसम्म तत्कालीन जलस्रोत मन्त्रालयको सचिवको जिम्मेवारी सम्हालेका थिए । साथै, २०५२ सालमा भएको महाकाली सन्धिको समयमा भारतसँग वार्ता गर्ने उनी प्रमुख व्यक्तिका रूपमा पनि चिनिन्छन् । मन्त्रालयबाट सरुवा तथा अवकास भएपछि पनि उनले निरन्तर जलस्रोतको क्षेत्रमा लेखन तथा अनुसन्धान गर्दै आएका छन् ।
सरकारी सेवाबाट अवकास भएपछि उपाध्यायले केही वर्ष अख्तियार दुरुपयोग अुनसन्धान आयोगको प्रमुख आयुक्तको जिम्मेवारी सम्हालेका थिए । यस्तै, उच्च ओहादमा रही मुलुकमा सार्वजानिक सेवा प्रवाह, व्यवस्थापन क्षेत्रमा राष्ट्रको छवि उच्च राख्न सफल भएको उल्लेख गर्दै उनलाई सम्मान गरिएको थियो ।
