केराबारी–न्यू मर्स्याङ्दी प्रसारण लाइनको अध्ययन असारभित्र सकिँदै

काठमाडौं । केराबारी-न्यू मर्स्याङ्दी १३२ केभी डबल सर्किट  प्रसारण लाइनको अध्ययन चालू आर्थिक वर्षभित्र सकिने भएकाे छ । राष्ट्रिय प्रसारण ग्रिड कम्पनीले अघि बढाएकाे प्रसारण लाइनकाे अध्ययन २०७८ असारभित्र सम्पन्न हुन लागेकाे हाे ।

अहिले केराबारी सबस्टेसनदेखि  मार्खीचोक स्थित न्यू–मर्स्याङ्दी सबस्टेसनसम्म पर्ने ३१ किलोमिटर लामो प्रसारण लाइनको अध्ययन भइरहेकाे छ । प्रसारण लाइन अध्ययनकाे काम अन्तिम चरणमा पुगेकाे कम्पनीले जनाएकाे छ । 

दरौदी र चेपे बेसिनका नदी खोलाबाट उत्पादन हुने विद्युत प्रवाह गर्ने उद्देश्यले यो प्रसारण लाइन निर्माण गर्न अध्ययन भइरहेकाे हाे । प्रसारण लाइन अन्तर्गत केराबारीमा १३२/३३ केभीको सबस्टेसन निर्माण हुनेछ ।

अहिलेसम्म प्रसारण लाइनको विस्तृत सर्भेक्षण कार्य सम्पन्न भइसकेको छ । वातावरणीय अध्ययन कार्यको लागि परामर्शदाता चयन गरी  कार्यसूची तयार पारेर विद्युत विकास विभागमा पेश गरिएको छ । आयोजनाको वातावरण अध्ययन असारभित्र सम्पन्न गर्ने योजना रहेको छ । साथै, प्रसारणलाइन निर्माणको बोलपत्र आह्वान पनि असारभित्र गर्ने कम्पनीकाे याेजना छ ।

यस्तै, केराबारी सबस्टेसनको जग्गा प्राप्तिको कार्य भइरहेको छ । सबस्टेसनकाे जग्गा प्राप्तिका लागि जग्गाधनीसँग छलफल भइरहेको र पर्खाल, भवन तथा पहुँच सडक निर्माणको लागि डिजाइन कार्य सकिएको कम्पनीले जनाएको छ ।

प्रसारण लाइन र सबस्टेसन निर्माण पूरा गर्न करिब ८० करोड रुपैयाँ लागत अनुमान गरिएको छ । आयोजनाको काम आर्थिक वर्ष २०७९/८० भित्र पूरा गर्ने लक्ष्य छ ।