ऊर्जा खबर
काठमाडौँ । ऊर्जा, जलस्रोत तथा सिँचाइ मन्त्रालयले ढल्केवर–मुजफ्फरपुर ४०० केभी सीमापार प्रसारण लाइनअन्तर्गत भारतीय खण्ड निर्माणका लागि स्थापित क्रस बोर्डर पावर ट्रान्समिसन कम्पनीको बिक्रीमा रहेको संस्थापक सेयर किन्न नेपाल विद्युत् प्राधिकरणलाई स्वीकृति दिएको छ । कम्पनीले बिक्रीमा राखेको भारतीय कम्पनी आइएल एन्ड एफएसको २९ लाख ७३ हजार १ सय ६३ कित्ता संस्थापक सेयर प्रतिकित्ता भारु १९.०५ का दरले खरिद गर्न मन्त्रालयले प्राधिकरणलाई स्वीकृति दिएको हो ।
उक्त सेयर खरिद गर्न आवश्यक ९ करोड ७ लाख ६ हजार ९ सय ६६ रुपैयाँ लगानी गर्न मन्त्रालयले विदेशमा लगानी गर्न प्रतिबन्ध लगाउने ऐन, २०२१ को दफा ३ को उपदफा (२) बमोजिम साेमबार राजपत्रमा सूचना प्रकाशित गरी प्राधिकरणलाई स्वीकृति दिएको जनाएको छ ।
कूल १२७.६५ किलोमिटर लामो उक्त लाइन निर्माण गर्न भारततर्फ मुजफ्फरपुरदेखि सुरसन्डसम्म ८५.५५ किलोमिटर लाइन निर्माण गर्ने नेपाल र भारतको संयुक्त लगानीको कम्पनी सिपिटिसी स्थापना गरिएको थियो । यस कम्पनीमा नेपाल विद्युत् प्राधिकरणको १० प्रतिशत संस्थापक सेयर पहिल्यैदेखि रहेको छ । यसमा आइएल एन्ड एफएसको ३८ प्रतिशत सेयर साझेदारी रहेको थियो ।
त्यस्तै, नेपालतर्फ भिठ्ठामोडदेखि ढल्केबरसम्म ४२.१० किलोमिटर लाइन निर्माण गर्न पावर ट्रान्समिसन कम्पनी नेपाल (पिटिसिएन) को स्थापना गरी काम गरिएको थियो । यो कम्पनीमा आइएल एन्ड एफएससहित भारतीय कम्पनीको ५० प्रतिशत हिस्सेदारी रहेको छ ।
नेपाल र भारत दुवैतर्फका दुई संयुक्त कम्पनीले सन् २०१६ फेब्रुअरी २० तारिकमा प्रसारण लाइन निर्माण पूरा गरी सञ्चालनमा ल्याएका थिए ।
