ऊर्जा खबर
काठमाडौं । ४ सय केभी डबल सर्किट भेरी कोरिडोर प्रसारण लाइनको अध्ययन अबको ५ महिनामा पूरा हुने भएको छ । सुर्खेतको मैनतडा सबस्टेसनदेखि पश्चिम रुकुमको त्रिवेणी सबस्टेसनसम्म पर्ने १ सय १० किलोमिटर लामो प्रसारण लाइनको अध्ययन चालू आर्थिक वर्षको असारभित्र सम्पन्न हुन लागेको हो ।
राष्ट्रिय प्रसारण ग्रिड कम्पनीले भेरी नदी बेसिनमा पहिचान भई निर्माणको विभिन्न चरणमा पुगेका तथा निर्माणमा जाने जलविद्युत आयोजनाको विद्युत प्रवाह गर्न यो प्रसारण लाइनको अध्ययन गरिरहेको छ । प्रसारण लाइनअन्तर्गत जाजरकोटको नलगाड, सुर्खेतको मैनतडा र पश्चिम रुकुमको त्रिवेणीमा गरी ३ वटा सबस्टेसन पनि निर्माण हुनेछन् ।
अहिले प्रसारण लाइन आयोजनाको पुरक अध्यय तथा टावर राख्ने स्थानको पहिचान कार्यका लागि परामर्शदाता छनोटको प्रक्रिया अन्तिम चरणमा पुगेको कम्पनीले जनाएको छ । कम्पनीका अनुसार प्रसारण लाइन अन्तर्गत सुर्खेतको भेरीगंगामा मैनतडा, जाजरकोटमा नलगाड र पश्चिम रुकुमको आठविसकोटमा त्रिवेणी सबस्टेसन निर्माण हुनेछन् ।
अहिले नलगाड–मैनतडा खण्डको विस्तृत अध्ययन एवं वातावरणीय अध्ययन भइरहेको छ । प्रसारण लाइन र सबस्टेसनको जग्गा प्राप्तिको काम भइरहेको कम्पनीले जानकारी दिएको छ ।
कम्पनीले मैनतडा सबस्टेसनका लागि सुर्खेत जिल्ला प्रशासन कार्यालयको समन्वयमा ११ हजार ५ सय १३ वर्गमिटर जग्गा प्राप्तिको प्रक्रिया अघि बढाएको छ । ८१ हजार २ सय ६५ वर्ग मिटर ऐलानी जग्गाको धनीलाई पनि क्षतिपूर्ति वितरण गर्ने कार्य अघि बढेको छ ।
नलगाड सबस्टेसनका लागि जग्गा प्राप्तिको काम सम्पन्न भइसकेको छ भने त्रिवेणी सबस्टेसनको आवश्यक जग्गा छनौटको काम भइरहेको कम्पनीले जनाएको छ । प्रसारण लाइन निर्माण गर्न कम्पनीले विद्युत विकास विभागबाट २०७५ फागुन २६ गते अध्ययन अनुमतिपत्र लिएको थियो । आगामी आर्थिक वर्षबाट निर्माण सुरु गरी सन् २०२४ भित्र सम्पन्न गर्ने लक्ष्य छ ।
