प्राधिकरण कर्मचारी संघकाे नेतृत्वमा भट्टराईको निरन्तरता

काठमाडौं । नेपाल विद्युत प्राधिकरण कर्मचारी संघको अध्यक्षमा जनार्दन भट्टराईले पुनः निरन्तरता पाएका छन् । संघको शनिबार सम्पन्न १२औं महाधिवेशनबाट भट्टराई अध्यक्षमा निर्वाचित भएका हुन् ।

अध्यक्ष पदका लागि भट्टराई, प्रमिला ढुंगाना, इन्द्रप्रसाद न्यौपाने र उमेशकुमार साह चुनावी प्रतिस्पर्धामा थिए । चुनावी प्रतिस्पर्धामा भट्टराई सबैभन्दा बढी २२४ मत ल्याई विजयी भएका हुन् ।

संघको नेतृत्वका लागि सक्षम देखेर नै यो पटक पनि कर्मचारीहरूले मतदान गरेर विजयी बनाएको भट्टराईले बताए । ‘म लामो समयदेखि संघको नेतृत्वमा छु,’ उनले ऊर्जा खबरसँग भने, ‘यस पटक पनि साथीहरूले विश्वास गरेर यो जिम्मेवारी मलाई दिनु भएको छ ।’

उनका प्रतिस्पर्धि ढुंगानाको पक्षमा ८०, न्यौपानेको पक्षमा ४५ र साहको पक्षमा ३३ मत खसेको थियो । सह–अध्यक्षमा टंकप्रसाद अधिकारी, वरिष्ठ उपाध्यक्ष (खुला) तर्फ खिमेन्द्र बुढाथोकी, पुष्पराज भट्टराई र राजेन्द्र थापा विजय भएको संघले जनाएको छ । 

संघका अनुसार महिलातर्फ वरिष्ठ उपाध्यक्षमा सुजना काफ्ले, मधेसीतर्फ नरेशकुमार चोरवार तथा आदिवासी जनजाती कोटामा भीमप्रसाद गनगाई महाधिवेशनबाट निर्वाचित भएका छन् ।

उपाध्यक्ष पदका लागि भएको प्रतिस्पर्धामा नवराज कडरियार सबिन कार्की निर्वाचित भएका छन् । महासचिव पदका लागि भएको प्रतिस्पर्धामा धिमन्तराज न्यौपाने चुनिएका छन् । 

श्रीराम सापकोटा उपमहासचिव पदमा तथा लक्ष्मी पराजुली कोषाध्यक्ष पदमा निर्वाचित भएको संघले जानकारी दिएको छ । संघको शनिबार सम्पन्न महाधिवेशनले १०१ जनाको नयाँ कार्यसमिति चयन गरेको हो । शुक्रबारबाट सुरु भएको महाधिवेशन शनिबारसम्म चलेको थियो ।