ऊर्जा खबर
काठमाडाैं । ऊर्जा डेभलपर्सको सम्बद्ध संस्था सामलिङ्ग पावर कम्पनीले ईलाममा निर्माण सम्पन्न ९.५१ गरेकाे मेगावाटकाे माई बेनी जलविद्युत आयोजनाले व्यापारिक उत्पादन सुरु गरेको छ। नवीकरणीय ऊर्जा विकास गर्ने उद्देश्यअनुसार याे कम्पनीकाे पहिलो सफलता हाे ।
माई बेनीकाे विद्युत खरीद बिक्री सम्झौता (पिपिए) बमोजिम व्यापारिक उत्पादन सुरु गर्नुपर्ने समयभन्दा दुई महिना अगावै व्यापारिक उत्पादन सुरु गरेकाे छ । कम्पनीका अनुसार आयाेजनाबाट असाेज १ गतेदेखि व्यापारिक उत्पादन भइरहेकाे छ । नेपाल विद्युत प्राधिकरणका प्रतिनिधिहरूको रोहवरमा विभिन्न चरणको परीक्षण सम्पन्न गर्नुका साथै १५ दिनको परीक्षण उत्पादन समेत सफलतापूर्वक सम्पन्न गरेपछि व्यापारिक उत्पादन सुरु भएकाे जनाइएकाे छ ।
कम्पनीका अनुसार माई बेनीले वार्षिक ५३.२८ गिगावाट घण्टा विद्युत राष्ट्रिय प्रणालीमा योगदान गर्नेछ।आयोजना प्रभावित क्षेत्रका बासिन्दाका लागि गत भदाै १८ गतेदेखि असाेज १ गतेभित्र आवेदन दिन सकिने गरी निष्कासन तथा बिक्रीका लागि खुल्ला गरेकाे ५ लाख (५,००,०००) कित्ता साधारणा सेयर लक्ष्यभन्दा ३.६३ गुणा बढी आवेदन परेकाे छ ।
यसैगरी, आयोजनाको कूल १२ लाख ३० हजार (१२,३०,०००) कित्ता साधारण सेयर (आइपिओ) मध्ये थप ७ लाख ३० हजार (७,३०,०००) कित्ता सेयरसमेत खुल्ला गर्ने योजना रहेको छ । जसमा, कर्मचारीका लागि १४ हजार ६ सय (१४,६००), सामुहिक लगानी कोषका लागि ३६ हजार ५ सय (३६,५००) र सर्वसाधारणका लागि ६ लाख ७८ हजार ९ सय (६,७८,९००) कित्ता सेयर प्रभावित क्षेत्रमा बासिन्दाका लागि छुट्याइएको आइपिओको बाँडफाँड सम्पन्न भएपछि निष्कासन तथा बिक्री खुल्ला गरिनेछ।
