ऊर्जा खबर
काठमाडौंँ । गरिमा विकास बैंक लिमिटेडका ग्राहकले विभिन्न व्यावसायिक संस्थाका वस्तु तथा सेवा खरिद गर्दा ६० प्रतिशतसम्म छुट प्राप्त गर्ने भएका छन् । शिक्षा, स्वास्थ्य तथा दैनिक उपभोग्य वस्तु तथा सेवा आपूर्तिकर्ताहरूसँगको समन्वयमा यस्तो सुविधा प्रदान गर्ने निर्णय भएको हो ।
सम्झौतापश्चात् गरिमा बैंकको डेबिट कार्ड, क्रेडिट कार्ड तथा मोबाइल बैंकिङ प्रयोग गर्ने ग्राहकले तोकिएका संस्थाबाट विभिन्न साम्रगी तथा सेवा खरिदमा छुट प्राप्त गर्नेछन् । बैंकका ग्राहकले अमेरिका (यूएसए) मा आधारित कोडिङ शैक्षिक संस्थाको अधिकृत साझेदार मेट्रो–ल्याब ईडिएक्सले प्रवाह गर्ने सेवामा अधिकतम ६० प्रतिशतसम्म छुट पाउने जनाइएको छ ।
मेट्रो–ल्याब ईडिएक्सले बालबालिकालाई कोडिङ र एआई (आर्टिफिसिएल इन्टेलिजेन्ट) बुझ्न विशेष मद्दत गर्ने बताइएको छ । यस्तै, बैंकका ग्राहकले ललितपुरको लगनखेलमा अवस्थित पेडल साइकल हाउसमा साइकल खरिद गर्दा १५ प्रतिशत र तिलोत्तमा–५ रुपन्देहीमा अवस्थित एनजी मार्केटका वस्तु तथा सेवामा अधिकतम १० प्रतिशतसम्म छुट प्राप्त गर्न सक्नेछन् । यसबाट बैंकका डेबिट तथा क्रेडिट कार्ड र मोबाइल बैंकिङ प्रयोग गर्ने ग्राहकहरू प्रत्यक्ष लाभान्वित हुने विश्वास लिइएको छ ।
बैंकले काठमाडौँ उपत्यकाभित्र २२ सहित देशभर १२३ शाखा कार्यालय, १ एक्सटेन्सन काउन्टर र ५१ वटा एटीएममार्फत ग्राहकहरूलार्ई वित्तीय सेवा प्रदान गर्दै आएको छ ।
.jpg)