ऊर्जा खबर
नवलपरासी । पश्चिम नवलपरासीको प्रतापपुर गाउँपालिका–७ गुठ्ठी सूर्यपुरास्थित गण्डक जलविद्युत् केन्द्रको उत्पादन पूर्णरुपमा ठप्प भएको छ । पूर्वी नवलपरासीको विनयी त्रिवेणी गाउँपालिकाको त्रिवेणीस्थित गण्डक ब्यारेजबाटै नहरको पानी बन्द भएपछि विद्युत् उत्पादन ठप्प भएकाे केन्द्रका प्रमुख पिताम्बर भुसालले बताए ।
उनका अनुसार भारतले जलविद्युत् केन्द्रको नहर बन्द (क्यानल सटडाउन) गरेपछि विद्युत् उत्पादन रोकिएको हाे । गत फागुन २६ गतेदेखि नहरमा पानी आउन बन्द भएपछि उत्पादन ठप्प पारिएकाे उनको भनाइ छ ।
लामो समयदेखि प्रत्येक वर्ष नहरमा पानी बन्द गर्ने चलन छ । नेपाल–भारत गण्डक सम्झौताअनुसार भारतले सन् १९७९ मा निर्माण गरेको केन्द्र ३१ अगस्ट १९८१ मा नेपाललाई हस्तान्तरण गरेको थियो । करिब ४४ वर्ष पुरानो गण्डक जलविद्युत् केन्द्रकाे नहरमा पानी छोड्ने र बन्द गर्ने भारतीय पक्षको हातमा हुन्छ ।
यसअनुसार भारतको उत्तर प्रदेश गोरखपुरस्थित गोरखपुर सिँचाइ विभागले उक्त विद्युत केन्द्रको नहरमा सरसफाई तथा मर्मत भइरहेको जनाउँदै नहरमा पानी बन्द गरेपछि विद्युत् उत्पादन बन्द भएको हो । भारतीय पक्षले हरेक वर्ष कात्तिक–मंसिर र चैत–वैशाख गरी दुई पटक नहरको पानी बन्द गर्दै आएको छ । यसले गर्दा हाम्रो घाटा हुनेगरेको जलविद्युत केन्द्रका प्रमुख भुसाल बताउँछन् ।
विद्युत् ठप्प भएपछि दिनहुँ ७ देखि ८ लाख घाटा हुने गरेको प्रमुख भुषालले जानकारी दिए । १५ मेगावाट विद्युत् उत्पदान क्षमता भएको उक्त जलविद्युत केन्द्र अहिले ४ देखि ४.५ मेगावाटसम्म विद्युत् उत्पादन गरिरहेको छ ।
३ वटा टर्वाइन भएको जलविद्युत् केन्द्रेमा २ टर्वाइनले मात्र विद्युत उत्पादन गरिरहेको छ । एउटा टर्वाइन बिग्रेर थन्केको छ । गण्डक जलविद्युत् केन्द्रमा रहेको विद्युतीय उपकरण पुरानो प्रविधिअनुसार रहेको हुनाले परिर्वतन गरी सुधार गर्नुपर्ने देखिएको उनको भनाइ छ ।
.jpg)
